O le tina ma nisi o le fanau

O le tina ma nisi o le fanau

“Na ma toe o i le falemai i le amataga o le tausaga lenei, ina ua piliki mai le palapala i le manu’a, ma ou talosaga i le fomai pe mafai ona taoto ai i le falema’i, ae fesoasoani mai pe fafaga lona tino i se IV, pe o se isi mea, ae pe mafai ona sui e latou (ona fusiga) ae fai mai e aumai i tua.

“Sa ave le fasi mea o le manu’a fai mai e fai ai suesuega, ma na oo i Niu Sila (le suesuega.) Ae te’i ua ma toe o atu loa e avatu i le piliki o lona ulu, ae fai mai loa le tala a le foma’i, o le faatonuga o loo pipii i le faila, “a toe avatu i le piliki o le ulu, na’o na fusi ae toe aumai i tua ua lē toe aogā iai se togafiti.”

“O le masina lava lenei, na toe piliki ai talu ai nei le ulu, ma sa toe talosaga foi iai, pe mafai na tuu la’u ma’i e taoto. Ae fai mai lava latou e leai, ae ta’u mai loa ma le lipoti mai Niu Sila, a avatu le ma’i lea toe ave i tua, ua leai se togafitiga.

“O le fomai teine, o le itu i le Emergency lea na fai mai ai. Na ou faamatala iai auga, ae fai mai o le lipoti o le faila la e maua i le falemai. Ua fai si leva ona avatu soo avatu soo ae o lea ua maua ane o le cancer.”

Leai foi se toomaga i le au HOME CARE

“Sa omai tagata, e fai fusiga i le fale, ae omai le au Home Care, e fai fusiga, e omai, e tigaina ai lava lo’u to’alua, e leai ni mea e faagase ai ona fufulu ai lea.

“Ua lē lavā ai e le tamā onosai, fai mai loa a toe omai fai iai e sili pe a tuu, e tigaina ai i le faiga o fusiga. Ae lē tea ai lava. Na’o le pau lava lena o le mea na omai ai le au Home Care.

“Ae tele lava ina omai, nai tamai taimi lava e faatino ai, e te vaai atu lava e iai lava le inoino, i le faiga o latou galuega, auā o le mea lena e fai faatatope ai ona o le manogi o le ulu.

“E fai ane Kirisimasi ua lē toe omai lava e fai ni fusiga, ae sa fautua mai e faaeteete i le siama. Ana ou lē fai lava iai e tuu ia te au ni mea ou te faia ai fusiga, e lē aumaia ni mea, ae lē tele foi.

“E oo mai nei matou te lē o mama’i lava ma la’u fanau, ae o lea matou te momoe faatasi lava, o loo alofa mai pea le Tamā oi Lagi.”

E lē o faagaloina e le tina ia Lauina le tuafafine laititi o lona toalua e ona le fanua o loo nonofo ai i Vaitele.

“O si tuafafine lena lea e maua mai ai fesoasoani, e pei o fualaau o loo inu ai si o’u toalua. O fualaau, e $50 i le pepa ta’i 10 fualaau e iai, ae faatolu na inu i le aso, ae totogi mai lava i Niu Sila e lona tuafafine le sapalai, ua silia ma le masina talu ona inu. O fualaau vaitamini o le tino, masalo o le isi lea fesoasoani tele o loo faaumiumi ai le mafutaga ma le tamā o le aiga.

“O lo’u to’alua e lotu Mamona lona aiga, ae ua fai foi si leva e lē o toe omai ni asiasiga. Ae o a’u ou te lotu Katoliko, ae na ma nonofo loa matou lolotu uma ma le ma fanau i le Mamona.”

“E lē o se tagata paie pe sa nofonofo”….. Papalii 

O le molimau a lona tuaoi, le susuga Papalii, “O si tamā lena, ua ma’i lava, ae oute ofo i le umi ona soifua, ma le malosi o lona tino e faafetaui le ma’i. Ae ua matuā afaina lava ona fofoga i le manu’a.

“Ae o taimi o malosi, o se tagata finau tele. Sa masani ona sau e sue atu se moavao ia te au, e alu e fai ai ana galuega moavao.

“Ma oute tago lava ave iai, e fesoasoani ai i lona aiga. Na iu lava ina ou tago ave uma iai moa vao sa ia te au, e alu e fau fau ai nisi moavao e fai ai ana galuega.

“Ma sa masani lava ona sau e tau aumai se mea, ae ta te teteea lava. O le mea lena oute alofa ai tele ia Alavine, aua e lē o se tagata faapea, sa paie, pe sa nofonofo foi i le fale.

“Sa finau e tausi lona aiga, ma saili le galuega e maua ai le tupe e tausi ai lana fanau. Ta te vaai atu lava e manava ane i se afiafi ma se taga pepa moa. O se faatauga, i le uma ane o le galuega o lena aso.

“Ae ina ua ma’i nei si tama, ae ua fiafia foi ua vaai atu ua maua le galuega a si ona toalua. Ou te maua lava le tala i le ma’i pe a sau lona atalii e sue atu se vai aisa. Ia ua fai lava ma masani le faato’a o le poloka aisa, e sue mai ae o iai e avatu iai.”

O moomooga o le tina ia Lauina, ma le maligi o ona loimata, o le faaauau pea lea o lana tausiga i lona toalua, “poo le ā lava le iuga, e alofa pea iai ma le faamaoni.”

Ae na te manatua ma le agaga faafetai le faamalosiau mai o le tuafafine o lona toalua i Niu Sila, o loo taumafai lava e fesoasoani mai ia te ia ma tamaiti.