Ua faitau tausaga nei talu ona oi oi ai lava i le fale le tamā lenei. Pau lava lea o lona leo e lagona 24 itula o aso uma lava, o le aaaauuuoooooi, aaaauuuoooooi..
Ua pala uma ese lava se vaega o ona fofoga, e aofia ai lona taliga ma vaega na o lona ulu o loo iloa atu i le ata. Na malie lava le tamā lenei ma lona toalua e faatalanoa ma le tusitala, ma tapue ona ata, ona ua leiloa lava poo fea e maua ai se mapusaga o le tamā.
E taoto faapiolua lava i totonu o le tainamu, i luga o le fasi momi ma aluga, ma le fola o le fale e leai se fala vagana ai le kapeta e lē a’ua’u foi.
O se vaaiga faamomoi loto tele le taatia mai o le tamā i se nofoaga sa lē tatau ona taoto ai se tagata o loo ogaoga se aafiaga o le gasegase o maua ai, ma manu’aga e tatau lava ona mamā faasoloatoa.
Aemaise ua na’o le faatalitali lava i le pule mai luga, ina ua fai ane iai le fomai, e ave i le fale ua lē aogā iai se togafitiga. Ae o lenei foi faatalitali e lē o faaletonu pe faatemutemu ai le tausiga a lona toalua. E ui i le ausage o le aiga ma le lima vaivai.
Meamanu si ona atalii mai lona toalua muamua, lea o loo nofo faasoloatoa ai totonu o le tainamu e milimili lona ulu, milimili ane autafa o le manu’a ma tamoe e sue mai se vaiaisa mai le tuaoi i taimi vevela o le aso, e to’a iai.
O le manogi faaletonu o le manu’a na ou lagona atu lava i fafo, oute lei oo atu i le faitotoa o le fale. E lē o se fale tele foi o loo nonofo ai le tamā lenei ia Alavine Avia ua silia i le 50 tausaga le matua ma lona toalua, ia Lauina Posala ma le la fanau e toafa.
Na matuā faigata lava ona faaauau le ma faatalanoaga ma Alavine ona o le tiga o lona ulu, pe a umi ona nofo i luga talu le ogaoga tele o lona manu’a, ua afua ai le faaletonu tele o le manogi o lona siosiomaga.
Ae talofa i lona atalii o loo la faafesagai pea, ua pei lava e leai se tulaga faapea o ia fesaga’ia. E oo lava i tamaiti laiti ifo ma lona toalua, ua pei lava o se mea fua le manogi faaletonu lea ua taai i totonu o le fale, ma ua silia ma le tausaga talu ona nonofo fesagai ma latou. Ua amata ona lē matala mai ni tala a le ma’i e foliga ua faigata ona minoi lona fofoga. “ua leva foi e lē o toe mafai ona ‘ai meaai e masani ai.”
“Ua na’o le susu lava lea e ola ai, e lē o le pepa susu e maua mai le povi ae o le susu e gaosi mai isi fualaau. O se isi meaai, e lē o toe mafai ona lamu ona ua faigata ona toe lue lona auvae.”
“O le tala a le falema’i, e aumai i le fale e tausi ai ua lē toe aogā iai se togafitiga, i le kanesa lea e maua ai
“Peitai e lē o toe o ane foi nisi e fai ni suiga. I le talanoa a le tina ia Lauina, “sa ou fai i le fomai e aumai oute faia fusiga, ona ua fa’atu si o’u toalua i le tiga tele o lona manu’a pe a omai tagata e fufulu. Ma ta te vaai atu lava i foliga o tagata e omai e iai lava le inoino ona o le manogi…”
Sa avane mea e fai ai fusiga, ae le tele foi. Peitai sa mafai lava ona ou malamalama i le tala a Alavine, i le mafuaaga o lona manu’a.
“Na amata mai i se fula, pei se patu sa laititi, ma faasolo ina lapoa ona ave lea tipi, mai le 2009.”
Ua lē lavā e Alavine talanoa, ma faaauau ai loa le ma talanoaga ma lona faletua, ia Lauina i fafo atu o le fale. O le faaputuga maa i lalo o le pupufa’i i autafa lava o le fale na ma saofafai ifo ai lava ma faaauau le talanoaga lenei i le mafuaaga o le ma’i o Alavine.
“Ma te nonofo mai ua ma’i,” Lauina
“Na ma nonofo i le amataga o le 2015, ma te nonofo ua ma’i. Sa toatele foi le matou aiga ae ua alu lava le tagata i le aiga o lona toalua, ae tuu ai na’o matou ma lona uso laititi, lea lava matou te nonofo ai iinei i le fanua o lona tuafafine laititi oi Niu Sila. Ua maliu lona tina, lena o loo teu mai luma o le fale.
“O le taimi e lei maua sa’u galuega sa alu lava si o’u toalua e faigaluega ma le ma’i. Sa alu moa vao, e alu lava e sue se mea e tausi ai matou ma le ma fanau.
“Ae ua savali nei le lua tausaga ua lē mafai ona toe alu sue se meaai ua taoto i le ma’i. Ua alu ai lona tino, ua na’o le susu lava lea e fafaga ai le tino, ma sa masani lava ona viga e fia‘ai i se mea sami.
“Sa ou vili lava i o’u mātua pe maua mai se fasi i’a e tausami ai, ou te manao lava e fai mea la e manao ai. O lea ua maua la’u galuega, i le kamupani a Saiga, e lē mamao atu ma le matou fale iinei lava i Vaitele. Ma oute faafetaia ai le Tamā oi le Lagi i lana faasoa.
“Peitai ua lē mafai ona toe ‘ai si o’u toalua. O le taimi nei, ua na’o le faguinu malulu lava le mea e momoo iai. E ese mai le susu o loo tausi ai. Ae a leai se susu e maua ua taoto lava e leai se mea e talitali ai le manava, ae tuli lona atalii i le tuaoi e sue mai se aisa e mapu ai le vevela o le aso.
“Ae na’o le pau lava lena o lana mea e fai i le aso atoa, o le auoi ai lava, e tele foi le alofa atu iai, ae a avatu i le falemai, e toe faafoi mai lava matou i le fale. Ua na’o le faatalitali lava, ae oute lē o malolo ai e taumafai pea e ave iai lana susu.”
