I le mae‘a ai o le 20 o tausaga talu ona toe faagasolo le tausala a le Kolisi o Samoa, o le tausaga lenei ua faamanatu faatasi ai le Tutoatasi o Samoa ma le faaaliga tele lenei e saii ai se tamaitai e fai ma sui o le Kolisi i ana atinae ma fesootaiga ma fafo atu o le Aoga.
O le tauvaga tausala na faatautaia e le vasega a le Kolisi mai i le tausaga e 1991-1994 ma o i latou ia na muai ave se fesoasoani ua fausia ai se faletusi fou o le aoga, fesoasoani lona lua o le faatotogaina o le faleaoga i tusi faapea ai masini computers ma le vaega lona tolu lenei o lana sailiga tupe mo le aoga, ua faia ai le faaaliga tausala ma le faamoemoe o le a faatau ai ea malulu mo le faletusi lava lenei a le aoga.
O se faletusi tele ma e moomia le iai o ea malulu ona o masini computers ua faatotogaina ai. O le vasega lenei e toatele ona sui ua maua galuega maualuluga i totonu o ofisa o le malo o kamupani i totonu o le atunuu, ma o nisi foi ua fai lava a latou pisinisi.
E aofia ai i le vasega lenei le tamaitai Ofisa Sili o le Pulega o le Suavai le tamaitai o Jamie Faavae, o le isi o le Ofisa Sili Lagolago o le Komisi o Tagata Faigaluega, sa avea foi ma Tausala o le Kolisi o Samoa i tausaga ua mavae, o le alii o loo sooupu a le televise o le KTV ma e fai foi lava lana ia pisinisi o taavale faatau atu o Fuimaono Alex Wright, o le Ofisa Sili Lagolago a le turisi o Roger Stanley, ma le anoano o isi sui sinia i Matagaluega a le Malo.
O le pule o le kamupani a le Sooula ua avea nei ma aoao i Malua, Tuiloma Bismarck Tamati lona faletua le tamaitai loia ia Leilani Tamati.
O le latou sao e toe faafoi atu se auaunaga mo le Kolisi o Samoa le auga atoa o lenei taumafaiga.
O le maota tele o sui tuai o le Kolisi le maota o le SCOPA na faagasolo ai le faaaliga tausala lenei ma e toaiva tamaitai o le Vasega 12 ma le Vasega 13 a le kolisi na tausinio ai.
O le tamaitai ia Vaifou Koria o lea ua avea ma tausala fou a le Kolisi o Samoa. O lenei tamaitai o se alo e faasino i le susuga i le faafeagaiga ia Rev Dr. Paulo Koria ma Mafutaga Koria o loo galulue i le galuega a le Atua i le Ekalesia Faapotopotoga Kerisiano Samoa i Faatoia.
O Vaifou, o le uii o le fanau e to‘a 12 a le susuga Paulo ma lona faletua ua maliu ia Dora Koria. O le faletua poo le tina ua iai nei le tina ia Mafutaga, na ia faamatala uiga o le uii lenei i le fanau, o se tamaitai na ia faaalia e ese foi ona uiga e filemu ma e tausaafia foi.
E fā vaega autu o le tauvaga ma vaega faaopoopo e tolu.
E fā vaega na manumalo ai le tamaitai o Vaifou e aofia ai le Taleni, Taligafesili, le Siva Samoa faapea le tamaitai e tele tagata e palota ai poo le Miss Popularity.
O isi vaega e pei o le Puletasi na manumalo ai le sui tauva na lagolagoina e Blessings Creation le tamaitai ia Mayantis, i le ofu e laeiina i Aso uma poo le Casual Wear na manumalo ai le sui tauva lona lima Mee Wha Atimalala, ma le manumalo i le Tausala aupito i Tausaafia o le tamaitai o Florence Johnston.
I le faatulagaga o le tauvaga na tulai mai ai Mee Wha Atimalala i le tulaga fā, tulaga tolu le tamaitai o Sauila Tolovaa na lagolagoina e le Rishas Creation, ma le tulaga lua na tulai mai ai le sui tauva na lagolagoina e le Samoa Island Design o Florence Johnston.
Na faaalia e Vaifou lona agaga fiafia ma le faafetai ona lea ua iu manuia ana taumafaiga ma avea ai o ia ma Tausala o le Kolisi o Samoa.
