O le tina o Peati Iupeli e lē tau faailoaina ona aafiaga i le gasegase faigata o le HIVIDS lea e lei maua lava e le ausuesue o vailaau faafomai se fofo e tineia ai le malosi o vairusi o le gasegase e aafia ai se tagata soifua.
O se tala faamomoi loto mo soo se tagata Samoa e malamalama lelei i le mea na tupu ma aafia ai lea tina o le atunuu, auā o se alii talavou o se alo ma se tamafanau a Samoa sa lauiloa i le lakapi le susuga Malaki Iupeli, sa osi feagaiga ma lenei tina i le faaipoipoga ma nonofo ai o se ulugalii ma maua le la fanau.
E matuitui tiga faalagona o soo se tagata e silafia le taunuuga na oo i ai le toalua o Peati ma le la fanau laiti e toalua na maliliu uma i le gasegase. Na totoe mai ai na o le atalii matua le alii o Natal lea e lei maua i ni aafiaga o le gasegase seia vaganā ona mātua ma ona tei laiti e toalua. O Peati ina ua ia silafia ma faamaonia ona aafiaga, sa lē matamuli e faailoa ona aafiaga, ona sa naunau e tala‘i i tagata se feau tāua e silafia ai auga o le gasegase ma lagona o se tagata ua maua ai.
Sa tautua i le Faalapotopotoga Faavae o le AIDS a Samoa ma sa faaaogā ai Peati e fai ma avefeau o le gasegase. O ona aafiaga i le taimi na faatoa ia iloa ai le gasegase ua maua ai, sa ia faaaogā lea faalapotopotoga e fofola atu ai mafatiaga o se tasi ua maua ai e pei o ia, ma le faasinosinolima i ai o tagata. O le mafuaaga foi lea na motusia ai lana galuega i se tasi o faletupe i le atunuu na galue ai.
Peitai e lei solomuli ai lenei tina lotomafatia ona sa ia onosai ma tauivi ma tiga o le gasegase aemaise o le tiga o uiga faaalia o tagata. O lona lē solomuli lea sa amata ai ona talia e le toatele fautuaga o le vaaia lelei o se tasi ua aafia, aemaise ua aveese ai lagona fefe i le mafuta faatasi ma se tagata ua aafia.
O le sao la o lenei tina e lē laititi e pei ona faaalia e le Pelesetene o le Kolusu Mumu a Samoa lea sa galue ai Peati a o lei maliu, le tofa Vaasilifiti Moelagi Jackson, ua tatau i se faigamalo ona ave se faailoga taualoa e amanaia ai Peati ma lana galuega lelei sa faia a o soifua.
O le Aso Lulu 27 o Me 2015 na auina atu ai e lona aiga i le falemai i Motootua mo ni togafitiga ina ua tiga lona laualo (manava). Na faia ai ni togafitiga ma taofia ai i le ICU mo gasegase tigaina lea na iu ai lona soifua i le po o le Aso Tofi 28 o Me 2015. O le a lē galo Peati ma lana galuega tāua mo le atunuu aemaise o le lalolagi sa pogisa ma leai se silafia loloto i aafiaga o le gasegase ona ua malamalama ai le toatele ma aveese uiga faailogatagata ia i latou ua aafia i le gasegase lenei.
Tatou tatalo ia maua se nofoaga fiafia o Peati i le lagi, ae mo i tatou o loo feola ma soifua pea, ia fai ana galuega lelei ma fafagu tāua ia i tatou mai lenei gasegase faigata.
