Na alafai mai Samoa i timuga o le aso o le faamanatuga o lona Tutoatasi ma e ui i le susū o Tiafau le malae o le faautugatagi ae e lei taofia ai le agai atu o fanau aoga, o sui o ofisa eseese o le malo ma Faalapotopotoga tuma‘oti.
O autalavou a ekalesia lotu eseese ma sui o malo mai i fafo i le fia molimauina o lenei aso ua atofaina e toe tomanatu ai Samoa ma tatalo e faafetai le alofa o le Atua ona o le isi tausaga ua faaopoopo i le ola tutoatasi ma le saoloto o Samoa mai i pulega a malo mai i fafo.
O le Ulu o Tokelau, le Lutena Kovana o Amerika Samoa ma le Palemia o Tonga o Malo faaaloalogia ia a le Malo o Samoa i le faamanatuga o lona tutoatasi i lenei tausaga.
Sa iai fuafuaga e leai ni valaaulia ona o le faaaliga a le Alii Palemia le susuga Tuilaepa Lupesoliai Sailele Malielegaoi, ua tele tausaga e lē tali mai nisi o malo faaaloalogia e ave i ai lenei faaaloalo ma o se auala foi lea o le a laitiiti ai le tupe alu pe afai e lē iai ni malo faaaloalogia, peitai o lea lava na toe tapa atunuu ua ta‘u uso ia Samoa i tausaga e tele ma o i latou foi ia na auai mai mo lenei aso tāua.
O faamanatuga o le tutoatasi i le atoaga lenei o le 53 o tausaga o Samoa na tatala e le tuuga fautasi i le Aso Toonai na tea nei ma e lima Sa na tausinio ai lea ua toe tulai mai ai le fautasi o le Tolotolo o le Tama Uli mai i le afioaga o Salelologa Savaii i le tulaga muamua.
Na latalata lava le tuuga ma le vaa a le Don Bosco 200 peitai na toe see ese lava i le tau faaiuiuga o le tuuga le Sa o Salelologa ma manumalo ai i le tinoitupe e $30,000 ae o le Don Bosco 200 na manumalo i le $20,000 (tala Samoa).
O faafiafiaga o lenei tausaga na faapea ona ave ai le valaaulia ia Asau, Palauli, Vaiee, Faleasiu, ma le itumalo o Siumu. O faleaiga uma o le tutoatasi na faamautu uma lava i Mulinuu i le isi ituala mai i le malae i Tiafau na faatautaia ai savali faaaloalo, ae faapea foi faafiafiaga mo le aso atoa.
E malamalama lelei ane le taeao ua mae‘a le sisiina o le tagavai o le malo tutoatasi ma o le malelega a le afioga mamalu i le Ao o le Malo, le Afioga i le Tui Atua Tupua Tamasese Efi na ave ai le faamamafa i le tāua o Samoa lava ia o se nofoaga ua tupuga atu ai le tele o isi motu o le Pasefika ma o faigamalaga na alu atu i Samoa mai i isi motu o le Pasefika e tatau lava ona ave i ai le faamuamua ma avea ma se tulaga e mitamita ai Samoa.
I lona tulaga tuputupu pea o se malo ua amanaia i upufai o le Pasefika ma fafo atu, na toe faamanatu ai e lana afioga mamalu i le tāua o le filemu e maua pea e malo ma e mafua mai i pulega a taitai e pulea le loto.
O lana faamanatu ua lē vaai ai i taua i le va o atunuu ae ua vaai i taua i lotoifale o atunuu eseese e pei foi o Samoa.
“E sili le toa e pulea lona loto i le toa e a‘ea le ‘olo. Auā a pulea le loto, ona toafilemu lea o aiga, o nuu, o atunuu ma malo. Ae aua foi ne‘i tatou seetia i le malū o le tai taeao i lo tatou faapea ane, ua leai se Taua. Auā o lea tatou te iloa i le seneturi e 19 i Samoa nei, pei o se ma‘i e latapaia ia Taua fai soo. Ae i nei ona po, ua ese Taua ia tatou te feagai.
O lea tatou te nofoilo i fuainumera o tina ma fanau e sauaina; i fuainumera o le faaoolima ma le fasioti tagata, i fuainumera o fanau e pule i le ola, i misa fai soo a fanau aoga, i ata matagā e faasalalau e telefoni ma komepiuta.
O se fagufagu ma se timai lea ia i tatou, ia o tatou toaga e momoli le feau, ‘E sili le toa e pulea lona loto i le toa e a‘ea le ‘olo – i o tatou aiga ma a tatou fanau.
Auā pau lava le mea tatou te maua ai le toafilemu, ona ua mafai e i tatou le aumatutua faapea ai ma le tinifu, ona pulea o tatou loto”, o le malelega a le afioga mamalu i le Ao o le Malo, le afioga Tui Atua Tupua Tamasese Efi. O le asō le aso malolo ua atofaina o le Tutoatasi o lenei tausaga.
