O se taumafaiga ina ia faaitiitia le soliga tulafono, o se galuega tuufaatasi e galulue ai leoleo ma Ekalesia Kerisiano i totonu o Manukau i Aukilani, lea na tatala aloaia i le vaiaso na tea nei i totonu o le ofisa tutonu a leoleo i Manukau.
O le susuga le alii Satini Sinia, Senior Sgt David Laumatia, sa taulamua i lea taumafaiga, o ia foi o se tasi o taitai o le faalapotopotoga o alii ma tamaitai Kerisiano i le matagaluega a leoleo o Niu Sila. Sa ia saunoa ma taitaia le sauniga o le polokalame, ma na ia ta‘ua ai e sili atu ma le 600 i latou o loo auai i lea faalapotopotoga.
Ta‘ua e Laumatia, e tolu tausaga o faatalanoaina ma faatali le ioeina mai le Komesina o Leoleo o lea faamoemoe. Ua mae‘a nei ona lolomi se nusipepa faitau faapitoa, e tuuina i totonu o potu taofia (Holding Cells), ma falepuipui. O le faamoemoe ia avea tautinoga o loo lomia ai a nisi sa solitulafono, ae ua liliu i le Alii, e avea ma se fesoasoani ia i latou, ina ia suia ai o latou olaga.
O se tasi o alo Samoa e suafa ia Amos Perese Ale, o loo faailoa ai lana tautinoga i le nusipepa, o ia o se tasi na amataina le kegi a le Head Hunters i Niu Sila. Sa falepuipui ma na ola i se olaga fasitagata, inupia, ma le tele o solitulafono o le faaaogāina o fualaau faasāina.
Peitai, na liliuina lona olaga ina ua ia talia Iesu e fai ma ona Alii Faaola. O le tausaga 1997 sa ia amata ai se kegi fou, o le au faipasika, ua faaigoaina o le Redeemed, mo ē ua Faakerisianoina o latou olaga. O le taimi nei o loo galue Amos o se Social Worker e fesoasoani i tagata solitulafono i Manukau.
O le tolu masina o lumanai, o le a faia ai aoaoga mo Ekalesia, ma i latou e fia fesoasoani i matagaluega a leoleo i nei polokalame, ina ia galulue faatasi ai.
O nisi o le mafutaga a faifeau i Manukau o loo auai ai e pei o le susuga Norman Hurlow o le Lotu Aso Fitu i Papatoetoe, Tony Romero o le Victory Outreach Papatoetoe, Ps Paul Gibson o le Lotu Papatiso i Otara, ma Lui Ponifasio o le LifeChurch i Manurewa.
