Talu ona talia e Samoa i le tausaga e 1967 le polokalame o alii ma tamaitai e iai tomai eseese mai Amerika e galulue fua i lo tatou atunuu poo Pisikoa, o loo faaauaua pea lea fesoasoani a le malo o le Iunaite Setete.
O le Aso Sa, 7 Oketopa na taunuu ai le vaega 84 o alii ma tamaitai Pisikoa Amerika o le a galulue i lo tatou atunuu lea sa faatali lo latou taunuu mai e le sui o lea Malo i Samoa ma nisi o lana aufaigaluega. I se pepa o faamatalaga ua faailoa mai ai e le sui o lea Malo i lo tatou atunuu, le alii o Chad Berbert, ua matuā telē le sao o le polokalame i le atinae o Samoa, ma o sana faatusa ua oo i le selau miliona tala Amerika le tau o le fesoasoani lenei mo Samoa i totonu o le 45 tausaga o faatinoina pea.
O le tausaga fou o le a galulue ai le vaega o Pisikoa fou i aoga eseese, ma o le a muamua feagai ma polokalame masani o le aoaoina o le gagana Samoa faapea tu ma aganuu masani, aemaise o le faamasani i le soifuaga i totonu o aiga ma nuu ina ia oo ane i le taimi e amata ai le latou tautua ua silafia ma iloa ia vaega tāua o le latou aumau ai i Samoa.
