Ua faailoa mai nei le Pepa Pa‘epa‘e a le Malo ina ua mae‘a fonotaga faalauaitele sa valaaulia ai le Atunuu mo so latou finagalo faaalia i le tulaga o loo iai le fanau laiti i Niu Sila.
O lea pepa sa maua ai le avanoa e fesiligia ai le Atunuu i auala e foia ai faafitauli o loo feagai ma aiga o loo iai fanau laiti. O le Pepa Pa‘epa‘e o loo faamanino ai le tali a le Malo i ana galuega o le a faataatia mo le taumafaiga e fesoasoani i le fanau laiti.
O lea la ua ave le faamuamua a le Malo i le 30,000 le aofai o le fanau laiti ua maua i faamaumauga ma lipoti a matagaluega a le malo o loo iai i ni aiga e ono lamatia ai le soifua o lenei fanau laiti.
O nei aiga o aiga e lei oo lava i ai le susulu o le malamalama i aoaoga ua tele tausaga o fai i Niu Sila ma faasalalau i le TV, leitio ma nusipepa faapea ua sā le faaoolima ma sauaga i le fanau ma le itupa o tamaitai i o tatou aiga. O ia faasalalauga sa taulamua ai foi nisi o susuga i faafeagaiga ma tamā iloga o Samoa lea sa faaulutala – “It’s Not Okay!”
Atonu e lē o po se lilo i le tatou Atunuu, o le tausaga 2007 lea na maliu ai Nia o se pepe laititi e 3 tausaga le matua i Rotorua. Ina ua mae‘a suesuega na mautinoa ai e toatele nisi o le aiga faapea foi latou sa nonofo tuaoi i lea aiga sa silafia lelei taimi na fasi ai lenei alualutoto ae e leai lava ma se isi sa fesoasoani i lenei pepe, poo se isi foi e loto toa e taofia i latou sa faia nei sauaga.
E leai foi lava ma se isi sa silafia o tupu nei sauaga i lenei pepe, sa iai se manatu e lipotia nei faiga i le Ofisa o Leoleo.
E lē na o le pau lea o tamaiti laiti ua maliliu i lima o o latou lava aiga. O lona uiga e matuā toatele naua le fanau laiti o loo lipotia pea ua maliliu mai lima o tagata o latou lava aiga, tagata sa tatau ona puipuia ma alolofa i nei tamaiti laiti.
O le tausaga 1999 na maliu ai James e 4 tausaga le matua ina ua atoa le 2 aso o fasi pea e le toalua o lona tina. Fai mai lipoti sa silafia lelei e nisi o matagaluega a le malo le sauā o lea tamaloa ae leai ma se isi sa faia se galuega e puipui ai lenei tamaititi laititi.
O nei uiga ma faiga o se tulaga aupito sili ona matagā mo Niu Sila. O loo faapea mai nisi o lipoti e tailima vaiaso ma maliu se tamaitiiti laitiiti i lima o tagata e tatau ona alolofa ma puipui i nei tamaiti.
I le tausaga ua tea na faaiu i le aso 30 o Iuni 2012 o loo lipotia mai e le matagaluega a le malo o loo nafa ma mataupu tau tamaiti, autalavou ma aiga – CYF – faapea e 9,411 aiga sa fai i ai a latou galuega ina ua lipotia mai ai sauaga i le fanau laiti.
O nei uiga saua o loo aofia ai le faaoolima ma le fasi e matua poo tagata matutua o le fanau iti. E le gata i lea ae e aofia ai ma uiga matagā sa latou ua faia amio lē pulea i nisi o a latou lava fanau poo tamaiti laiti o o latou lava aiga.
E aofia ai foi ma i latou ua tuu tia‘i a latou fanau i fale poo taavale e aunoa ma se tagata matua e vaaia pe fafaga nei tamaiti. O latou uma nei ua lipotia mai i le tausaga ua tea ma o loo galulue i ai le Ofisa o le CYF a le Malo. E ui o loo lipotia mai o le toatele o nei aiga o aiga Maori, peitai ane o loo aofia ai foi ma aiga Pasefika, ma e toatele ai lava le fuainumera o aiga Samoa.
O le fesili o ai ea o le tatou Atunuu o fesoasoani i nei aiga Samoa? Afai o susuga i faafeagaiga, faapefea pe afai e lē o toe o i se lotu nei aiga? Afai foi o le matai o aiga, o maua pea mafutaga faaleaiga? Afai foi e maua le avanoa e fesoasoani ai, o faapefea ona momoli lea fesoasoani?
O le autū o le Pepa Pa‘epa‘e a le Malo o le a matuā faasaga le Malo ina ia galue ma le malosi e puipui nei tamaiti mai sauaga o loo faia i ai e o latou mātua poo latou aiga. O lona uiga o le falepuipui lava o le a oo i ai soo se tagata matua e faia nei uiga ia latou fanau.
E ui i lea galuega tāua, ae o loo matou fautuaina foi le Malo ina ia silasila toto‘a ane i le fuainumera o le silia ma le 270,000 le aofai o tamaiti o loo ola i se tulaga matitiva.
O lona uiga e tofu uma nei tamaiti ma aiga o loo ola matitiva i Niu Sila. O nei aiga o loo vaivai tupe maua i aso faifai pea. E lē gata i lea, e faaletonu foi fale o loo nonofo ai.
O le isi o loo toatele tamaiti i nei aiga o loo maua i le tele o faama‘i pipisi o le tino ae e lē o avea e o latou mātua e vaai fomai poo le fautau mai o vai mo le puipuiga o le soifua maloloina o nei fanau. O mataupu nei o loo faatalanoa e le Pepa Pa‘epa‘e a le Malo, ma o loo finau ai nei le Palemene a Niu Sila.
Ou te manatu e tatau lava ona ave le faamuamua ia maua galuega e galulue ai le tatou Atunuu, auā o Niu Sila, afai e leai sau galuega, ma afai foi e lē lelei le totogi o lena galuega, e faapefea ona e tausia lou aiga ma maua se lumanai manuia?
O le isi, poo le ā lava lo tatou matitiva, ae o le matua alofa e ave le faamuamua i tupulaga lalovaoa auā o le lumanai lea o se aiga ma se Atunuu. Afai e manuia i latou, e faapena foi ona manuia Samoa mo a taeao.
