O se mitamitaga foi i auauna paia a le Atua ma tagata lotu o le Ekalesia Worhip Centre i Kuiniselani, ina ua maua se avanoa faaauro e feiloai atu ai i lo latou taitai e pei ona iai i se asiasiga i le Aso Toonai 13 e oo atu i le Aso Lua 16 o Oketopa. Sa talimalo ai Ekalesia uma a le Worship Centre a Kuiniselani i le Komiti Faafoe a le lalolagi atoa e pei ona iai i fonotaga tāua mo le agai i luma o le galuega a le Atua.
O i latou sa malaga mai e aofia ai le Taitaifono – Susuga Faafeagaiga poo le Aposetolo – Pastor Viliamu ma le Faletua ia Lavina Mafoe; o le Failautusi – Susuga Faafeagaiga Moala Siliva Moala; le Teutupe – Faafeagaiga Matamua Asipa Pati; ma le Suetusi – Susuga ia Tapuai Sepulona Moananu.
O le taeao o le Aso Sa i le 9.30 na faataunuuina ai sauniga ma polokalame uma faapea ona toe sosoo i le 5.30pm i le afiafi i le hall a Marsden State High School.
Sa uli ma sao le fonotaga e pei ona malaga mai ai le komiti faafoe, ma o le Aso Lua 16 o Oketopa na toe taliu ai le faiga malaga i Sini e fuafua mo Niu Sila mo le faaauauina o fonotaga ma agai atu ai i Samoa.
O le taitai a Brisbane le susuga ia Ps Frank Harder ma le faletua ma o loo sologa lelei pea le gasologa o le galuega i totonu o Kuiniselani.
Momoli foi le faafetai i le susuga i le Aao tusitusi, le susuga ia Pastor Anthony Mauinatu e ala i ripoti tuuina mai.
