O le nofoaga autu o le Polish Hall i Canley Vale o loo galue ai le susuga i le faifeau ia Ps Rupi Lumaava ma le faletua ia Mata, na taualuga ai i le Aso Sa na tea nei, se mafutaga a le Falelua a le AOG Tutoatasi a Mt Druitt ma Cabramatta na faia mo aso tolu. Na soosootau‘au ai ma le AOG Tutoatasi a Mt Druitt lea e galulue ai Ps Visita Amosa ma le faletua ia Va.
O lea foi mafutaga faamalosi i Ekalesia nei e lua i Sini nei na malaga fapitoa mai ai i Amerika Samoa le Toeaina ia Ps Kolose Omeli mai Nuuuli faapea le Taitai Aoao o le Ekalesia ia Ps Muliselu Lotoa mai Las Vegas, Nevada.
Na saunoa i laua i le auga o lenei feiloaiga mai le Aso Tofi seia paia le Aso Toonai, o auala e faamalosia ai sui ma fanau o Ekalesia nei e lua auā le faaolaina o le galuega mo le Atua.
Na faatusalia e Ps Visita Amosa le tāua o galuega a soo se tasi i totonu o le Lotu e faatusalia i vaega eseese o le tino lea e tofu lava ma le tāua ma lona aogā. O le faifeau, tiakono, taitai autalavou o faletua e tofu lava ma matafaioi.
Na saunoa foi le susuga ia Ps Rupi Lumaava ma ia faailoa le matagofie o le faatasiga ma le ekalesia aemaise malo malaga mamao mai mo viiga mo le Atua.
O le taitai aoao o le Ekalesia mai Las Vegas na saunia le lauga autu e taualuga ai le mafutaga ma fai ma oso i le tapuaiga a Mt Druitt ma Cabramatta. O viiga ma siva faaleagaga a le ekalesia Mt Druitt na sosoo, ae taualuga e Cabramatta.
O se tasi nei o auga o le mafutaga o le unaia ma faapupula pea le fanau i le finagalo o le Alii aemaise le faaaogāina o la tatou gagana Samoa e fesootai, tautatala ma femalamalamaai ai fanau.
Na sosoo ai ma le valaau e talia ma faaiu ai i le faamanatuga na faapaiaina e le toeaina ia Ps Kolose Omeli. Sa mae‘‘a ma tapena ai e le ekalesia se toonai tele e talisua ai faifeau ma le aulotu aemaise malo na asiasi atu e latou te faitaulaga.
Na mae‘a faagasolo foi faaaloaloga masani ma ta‘ape ai le paia ma le aofia. Ua toe taliu atu nei le taitai Aoao i Las Vegas faapea le Toeaina i Amerika Samoa.
