E le o le malosi poo le fitafita, ae faamoemoe sailigamalo i le taitaiga a le Agaga o le Atua, o le saunoaga lea a le susuga ia Pineula Fuimaono le faatonu o le pisinisi fou le Kingdom Employment Agency, pei ona faapaiaina ma tatala aloaia i le afiafi o le Aso Tofi na tea nei.
Na faatasi atu sui o la laua Ekalesia le Worship Centre i Sunshine, faapea sui o le Ia Malamalama Bible College, aemaise tauaiga ma uo, e molimoli faatasi le viiga ma le faamanū ona o le faamoemoe sa fau ao fau po aemaise o le tulivae atu i le Atua, a o lea ua faataunuuina.
O si a la faafeagaiga le susuga ia Atapana Ete na taitaia le sauniga ma saunoa ai i upu faalaeiau mai le Afioga Paia, ae o le susuga ia Salesi Kaho na tatalo e faapaia le Pisinisi ma tatala aloaia ai, na faaalia lo la agaga faafetai i le lagolago a le Au Tatalo a le Ekalesia, ma faiaoga ma uo mai le Bible College.
O lenei tautua ua amataina, e mo ē o tau saili ni galuega i factories, ua iai fale faigaluega (factories) ua faamatuu ane le sailiga o ni a latou tagata i le tautua a le susuga ia Pine ma le faletua ia Pu‘a. Na o la saunoa foi, e talitonu ma faatuatua e tele nisi kamupani ma pisinisi o le a tatala mai avanoa e galulue faatasi ai auā nai o tatou tagata.
Na mae‘a le taumafataga, ona alo lea o le aiga alii mo faaaloaloga mo le Aufaigaluega Paia ma malo faaaloalogia pei ona fai ai le fofoga o Fuimaono Atanoa Aloalii ma sui o le aiga, o le fofoga o le faafeagaiga ia Paepae Brown na fai ma sui o le Ekalesia ma Faifeau, ma ta‘ape fiafia ai ma le viiga ua maualuga.
Ia faalautele e le Atua le tautua a le Kingdom Employment Agency, ma ia tele ni tagata Samoa e manuia ma maua ni a latou galuega i le tautua a le Kamupani.
