O le vaiaso talu ai na faagasolo ai mo le taimi muamua se semina faifua(free) a le Fono Aoao a Tagata Samoa i Sini mo le 2014.
O le sini o lenei faamoemoe ia faailoa atu i le mamalu o le atunuu o loo alala i Sini nei nisi o faamatalaga, auaunaga ma fesoasoani e mafai ona latou maua mai nisi o faalapotopotoga e pei o faletupe, fomai, matagaluega o fale o le malo, ofisa o leoleo ma faamasinoga, lafoga ma le super, sulufaiga mo fanau(Foster Care).
O le nofoaga o le Trotting Club na faia ai lenei faamoemoe sa auai ai le tusa ma le selau tagata. O le susuga i le faufautua o le Fono Aoao ia Rev Leleimalefaga na taitaia se tatalo amata ma faagasolo ai loa i latou na ofo atu le latou tautua ma le tomai i nei matata eseese.
O le afioga a Leilua Jerry Uesele o le Public Officer a le Fono sa avea ma fofoga o le po. E toaono sui na saunoa i lea po. Na muamua le tamaitai pule o le faletupe o St George o Rhonda Thompson.
O le mataupu na saunoa i ai le tamaitai pule o nonoga tupe, auala e mafai ai ona tala lau super ma le faaaogāina o lau super e totogi ai lau inisiua. O le isi fesoasoani tele a Rhonda o le faailoa lea i le atunuu le tatau ona saili ma faafoi mai a latou super o loo leiloloa.
Na sosoo ai ma le talanoaga a le afioga ia Seagaitumua Dr Paniani Patu, sa mamafa lana talanoa i faama‘i e pei o le ma‘i suka ma le toto maualuga. E le gata i lea o auga o le ulaula tapaa. Faaalia e le fomai le tāua tele o le faia o siaki ma sailiga a fomai e vave iloa ai poo ā togafitiga e moomia mo tagata ua aafia e lē gata i lea e tatau foi ona usitai i le fomai.
“O le tele lava o tagata e fai atu ua ma‘i suka ma toto maualuga ae lē talitonu ma pei e liuliu faalii mai i le fomai. Ua avea nei le mai suka ma le toto maualuga o le fili numera tasi o o tatou tagata, ma e tatau lava ona faaeteete auā e sili le puipuia nai lo le togafitia.”
O le saunoaga lona tolu i lea po sa avea ai le failautusi a le Fono aoao ia Feagai Kirisome o loo galue i le ofisa o Fale a le Malo. “E tele fesoasoani e ofo atu e le Matagaluega ma e mafai foi ona totogi e matou Bonds o fale e fia siitia i ai aiga pe a lē lava le faasoa.”
O nei tupe e toe togitogi atu ma afai ua leai ni fale o nisi(homeless) e ono faigofie ona faatopetope a latou talosaga lea e atoa le luasefulu tausaga o faatali i pitonuu e pei o Fairfield. Sa maua foi le avanoa o le susuga Tim Wales mai le faamasinoga(justice) ma Yasmine Hunter (police) e talanoa ai i polokalame faataoto a matagaluega nei mo le faalaloina o fuainumera maualuga o fanau Samoa o loo falepuipui ma vaaia ai le faaitiitia i le 39% o tamaiti ma talavou Samoa ua faasalaina talu mai le tausaga ua tuanai 2013.
Na sosoo ai ma le tamaitai o Tofiga Tuigamala o le B&T United Finance mai Melepone lea ua iloga lana tautua i le faatumuina o lafoga mo seleselega o lenei tausaga faaletupe ua uma.
“Ua faamalosia nei le faamaoni o le faatumuina o lafoga e le matagaluega. Na ia saunoa foi i le tāua o faamaumauga i api lisiti ma tala o tupe maua i pisinisi laiti aemaise tupe faaalu i meafaigaluega, togiga ma penisini. Na taualuga lea afiafi i le faatagisia e le Sulufaiga o Aiga poo le Foster Care o le atunuu e tusa ma la latou auaunaga e saili ni tagata poo aiga e malu ai nisi o fanau o loo fia maua ni o latou mātuafai poo ni aiga e soifua saogalemu ma fiafia ai ina ua lē manuia o latou aiga i aafiaga o le ava malosi, fualaau faasāina, tetea mātua ma isi sauaga.
O le tamaitai ia Audrey Hill na ia saunoa i lea mataupu auā e talitonu o ia, e agavaa nisi o aiga Samoa i lea galuega laveai auā e totogi mai e le malo. Sa taualuga le po i se faafetai a le taitaifono ia Teleiai Sonny Wilson i sui na saunoa faapea le atunuu na auai mo se malamalama fou e le aumaua. O le isi faamoemoe ua atofa nei mo Oketopa.
