O le Sui o le Fono a Sui Tofia, Afioga Tuimalealiifano Vaaleto‘a Sualauvi II, sa ia tauaveina tiute o le Ao mamalu o le Malo o loo toesea ma le atunuu ona o ona tiute, na te talia ai tusi tofiga o le Hai Komesina fou o le Malo o NZ i Samoa, le faletua o Jacqueline Anne Frizelle i le sauniga e faia i le ofisa o le Ao mamalu o le Malo i Motootua.
Na faaalia e le tamaitai Hai Komesina, o Samoa o se atunuu o loo taimua i lenei faaitulagi o le Pasefika, ona o le maopoopo ma lelei o ana pulega malo, aemaise foi le tulaga mautu o le atinae o lona tamaoaiga, e ui lava i le tulaga faaletonu na tulai mai ai le tamaoaiga o le lalolagi atoa, aemaise foi nisi o mala faalenatura na afaina ai Samoa, ae o loo vaaia lava le sologa lelei o lona tamaoaiga.
Sa faaalia foi se finagalo o lana afioga i le Sui o le Fono a Sui Tofia, Afioga Tuimalealiifano Vaaleto‘a Sualauvi II, ma faailoa ai le telē o le fesoasoani o loo maua e Samoa mai atunuu tetele o loo latou faipaaga pea, e aofia ai foi la ma Niu Sila, lea o loo telē lana fesoasoani ia Samoa ma lona tamaoaiga, e tauala mai le itu tau i aoaoga, o le soifua maloloina, o taaloga, ma galuega o fausaga tetele a le malo.
O le tamaitai Hai Komesina fou sa galue i le matagaluega o faatoaga ma faigafaiva a le malo Niu Sila mo tausaga ua mavae, ma sa avea foi ma faufautua mo le vaega o faigafaiva a le Malo o Solomona. Sa galue foi mo ni tausaga i le matagaluega o le va i fafo a lona Malo a o lei filifilia i lona tofiga fou.
E tolu tausaga o le a galue ai o ia i le atunuu, ma o lana uluai valaaulia mo taitai o le Malo, ma sui o isi malo i fafo o loo galulue i Samoa, o le fiafia e faamanatu ai le Waitangi Day i le Aso Lulu o le vaiaso na tea nei, ma sa faia lea i le maota o le Hai Komesina o Niu Sila i Letava i Vailima.
