Ua agai i le ono masina e lē o faalogoina lava se faamatalaga o fusuaga faapolofesa a Samoa, ma ua lē o maua foi ni tala o ni fusuaga lata mai a siamupini o Samoa e pei o Vaitele Soi ma Warren Fuiava.
Peitai i se faamatalaga a Pa‘u Fereti Puni o le kamupani fai fusuaga a le Event Polynesia o loo faapea mai ai, “Ua o se malu a o lumanai le agi o matagi malolosi.”
O le fetalaiga a Pa‘u o loo faatatau i le mae‘a ona sainia o le konekarate e fusu ai Pele Faumui o Samoa ma Rohan Murdoch o Ausetalia i Brisbane mo le fusi o le WBO Super Middle Weight Asia Pacific Youth Title i le aso 2 o Mati.
Faaalia e Pa‘u, “O lea ua taunuu mai foi le konekarate a Warren Fuiava o Samoa e fusu ai ma Blake Caparello o Ausetalia i se tasi o fusi faaitulagi o le lalolagi i le aupaga o le light heavyweight i Melepone i le aso 18 o Aperila.
O loo tulimatai e Pa‘u faasologa o le 2013 i lana faamatalaga e faapea, “E maeu tulaga ua mafai ona faatinoina i le utiuti o seleni mo le faatuina ma tapenaina o se alafua mo tama fusu Samoa e mafai ai ona maua so latou lumanai i tupe maua i le mae‘a o le tautua i taaloga ‘amateur’. O se tulaga o loo faamanuiaina ai tama Samoa o loo lakapi ma taaalo liki.”
O le tausaga nei ua oo ai faatinoga i le vaega mulimuli o le polokalame faataatia e lima tausaga na afua mai i le 2007 ina ua talosagaina Event Polynesia e faia le uluai fusuaga a Monty Betham Jr i Samoa, lea sa vaavaalua ai ma le kamupani o le Polynesian Xplorer i le sootaga ma asosi faifusuaga a Samoa, le South Pacific Boxing Inc (SPBI) ma le Samoa Amateur Boxing Association (SABA).
O le amataga o le 2008 na avea ai Event Polynesia ma faifusuaga laiseneina a le World Boxing Organisation (WBO) lea sa mafai ona faatino ai le fusuaga mo le fusi o le WBO Asia Pacific i le aupaga o le cruiserweight i le va o Laurence Tauasa o Samoa ma Charles Baou o New Caledonia i Apia. Na manuia Lawrence i le fusi maua ma lana tupe ae sefululua masina o tau togitogi e Event Polynesia pili o le fusuaga.
O le masina o Oketopa o le tausaga lava lea na faamautuina ai e Event Polynesia le fusuaga a le siamupini o Samoa i le aupaga light heavyweight ia Togasilimai Letoa ma le siamupini o Niu Sila ia Soulan Pounceby mo le fusi o le WBO Asia Pacific i Aukilani. E lei manuia le taumafaiga a Togasilimai ma o loo fusu nei i Ausetalia.
O le tausaga 2009 na tapena ai loa e Event Polynesia konekarate taalo mo tama fusu lea na amata ia Vaitele Soi ma Warren Fuiava, sosoo ai ma le konekarate faifaatasi e lima tausaga mo Leti Leti e koleni ma fusu ai i Las Vegas. I le taimi nei ua toe foi i Samoa Leti i mafuaga mo lona aiga ma ua taalo nei i Ausetalia lea ua lua ai ana fusuaga e manumalo uma.
I le taimi nei, e tusa ma le sefulu ma le lima tama fusu faapolofesa o loo i lalo o le pulega a le Event Polynesia o i latou uma na taaalo i le Samoa Pro-Am Fights sa faia i le Faleata Gym 1 mo le sailia o le faatulagaga o tama fusu. Mo le faalauteleiina o le silafia sa faapea ona faatupeina ai e Event Polynesia le auai atu o nisi o tama fusu i taaloga i Fiti, Tahiti, Niu Sila, Saina ma Filipaina i tausaga ua mavae.
Faaalia e Pa‘u, “O loo matou nofo manino i le mananao o le toatele e faia ni fusuaga tetele i Samoa. Peitai, e tatau ona muamua ona tapena a tatou tama fusu, e faapea foi ona manaomia ni taamilosaga i Samoa ma atunnu i fafo e atinaeina ai lo latou silafia i le taaloga. O le mafuaga lena o le amatalia o le taamilosaga o fusuaga faapolofesa a le Pasefika le Pacific Rim Boxing Championship (PRBC) i le tausaga ua tuanai.”
I le taimi nei o loo faia fesootaiga mo le faia o se fusuaga tele mo le sailia o se siamupini faaitulagi e fai ma paga faapitoa o le fusuaga o le Sisigafua o le tausaga nei i le po o le Aso Tofi, 30 Me faatasi ai ma paga a tama fusu mai le Pasefika e fetaui ma le ‘au a Samoa o se vaega o le vae i Samoa o le taamilosaga o le PRBC.
E faafetai le Event Polynesia i le lagolago a le Malo i le tele o nei tausaga o loo auala mai i le TAB, o le Komiti o le Sisigafua ma le SSFA; o paaga i le atinaeina o fusuaga faapolofesa le falekoleni o JP Fitness, le faletaavale o le Motor 1 Samoa ma le faletogiga o le Carisbrook NZ; faapea ‘sponsors’ o le Bluesky, Vailima Breweries, Agility Logistics, Pacific Ezy Money Transfer ma le EMAYSE, aemaise o paaga faasalalalau e iai le Samoa Observer, TV3, TV1, Radio 2AP ma le lagolago a ofisa faasalalau i Samoa ma atunuu i fafo.
O loo iai le talitonuga maumaututu o Pa‘u i le alafua na faataoto e le Event Polynesia i le lima tausaga talu ai o le a faapea ona maua e se alo o Samoa se fusi o fusuaga faaitulagi a le lalolagi i le tausaga nei.
