Ua vavalalata pea sootaga o Samoa ma le Malo o Initia talu mai ona faavae a la faiā faalemalo nei mai le 1970, i le tele o taumafaiga tau i le atinae aemaise o le avea o Samoa ma atunuu e malaga mai i ai nisi o le aufaipisinisi mai Initia ma faafoe ai a latou taumafaiga.
Ua atili mafana sootaga ona ua iai foi o tatou tagata ua tala gafa i alii ma tamaitai Initia e le gata i Samoa nei a o atunuu i fafo e pei o Niu Sila.
O le Hai Komesina fou o Initia mo Samoa ae faamautu i le ofisa tutotonu o lea Malo i Ueligitone i Niu Sila, o Avanindra Kumar Pandey.
Sa feiloai atu i lana afioga i le Ao Mamalu o le Malo, Afioga Tui Atua Tupua Tamasese Efi, i le Aso Lulu, aso 13 Fepuari, mo le tauaaoina o ona tusi tofiga poo credentials.
Ua sui tulaga o ia i le Hai Komesina o Initia ua mae‘a lona taimi galue, lea foi sa malaga mai i le atunuu ma tauaao ona foi tusi tofiga i le Ao Mamalu o le Malo i nai tausaga ua mavae.
E tofia nei le sui fou o lea malo Asia mo Samoa, ae o loo galue o le Amepasa o Initia i Sudan se tasi o atunuu o le koniteneta tele o Aferika.
