O le taimi ua tatala aloaia ai e le Palemia, le Minisita o tagata Pasefika a Niu Sila, le sui o le Malo o Iapani ma le susuga i le faifeau Nuuausala Siutaia le nofoaga tutotonu muamua mo le Pasefika ua faatuina i Samoa mo polokalame e suesue ai ni fofo i suiga o le tau

O le Minisita o Tagata Pasefika a le Malo o Niu Sila le afioga Aupito Su’a William Sio, o se tasi o saunoaga aami o le tatalaina o le uluai nofoaga ua faatuina mo suesuega o suiga o le tau mo atunuu uma o le Pasefika.

O Samoa ua faatu ai le nofoaga ma ose mitamitaga lea o le alii minisita e pei ona ia tomua lana saunoaga i le tatalaina o le galuega, i lona faailoa o lona amata i le gagana Samoa o lona atunuu e faamemelo ma sa’afi i ai. 

Na saunoa Aupito ma ia faailoa le lagolago malosi a Niu Sila i taumafaiga e puipuia atunuu o le Pasefika i suiga tetele o le tau aua o se galuega e manaomia le tutu ma galulue faatasi ai o atunuu.   “A’o lenei aso ua tino le lafoga sa tatala iai le tofa ma le faautautaga a ta’ita’i o le  Pasefika le SPREP, ma le Malo o Samoa ma Iapani mo se ofisa faapitoa mo le fautuaina ma tu malosi mo le lagolagoina ma faa’aupegaina o finagalo o ta’ita’i o motu o le Pasefika mo le sailia oni tali lelei ma le mautinoa i fesuia’iga o le lalolagi e aofia ai ma lenei itulagi o le Pasefika.   E ui ina ua tatou iloa ua tulaga faigata le lalolagi ma ona suiga peitai ua le avea lea ma ala o le nofoa’i ai o ta’ita’i mataala o le Pasefika ae saili pea manu mo tagata o le Pasefika”o se vaega lea o le saunoaga a le alii minisita o tagata Pasefika o Niu Sila. O le nofoaga tutotonu o suesuega o suiga o le tau na faatupe e le Malo o Iapani i le tau e 19 tesimale 4 miliona tala Samoa.  O le Malo o Niu Sila o lana lagolago o le a totogi ai nisi o tofiga o le pulega o le nofoaga mo le umi e tolu tausaga. 

O ia tulaga tofi e aofia ai ma le Pule o le nofoaga tutotonu o suesuega o suiga o le tau. 

O le nofoaga tutotonu o suesuega o suiga o le tau mo atunuu o le Pasefika

O se tasi lenei o mataupu ma’ale’ale i finagalo o ta’ita’i o le Pasefika e aofia ai Samoa ona o aafiaga e mafua mai i gaioiga a malo tetele ma malolosi tamaoaiga e ala i falegaosi oloa o loo pua’ina atu i fafo kasa oona o le kaponi ma faatupuina ai le vevela ua liusuavai ai le pole i matu ma siitia ai le tai poo le sami ma lamatia ai atunuu laiti ma maualalalo. 

O le faalapotopotoga o le siosiomaga o le Pasefika le SPREP o loo i Vailima ua iai faatasi ma le nofoaga o suesuega o suiga o le tau.  

O le faalapotopotoga foi lea o le a taulamua i le vaaia o le faagaioia o le nofoaga auā o le leo lea o le Pasefika i polokalame faatino mo le puipuiamalu o le siosiomaga o atunuu taitasi.