E ui lava e fesuia’i tausaga ma fesuia’i tofi o e galulue, peitai e le mafai ona suia ai le a’a ma le faavae na tōtōina ai se fatu ina ia maua le alofa moni e faasafua atu le agalelei. O le ‘auga lea o le Sosaietete Fesoasoani poo mafutaga a Tina ma faletua, o latou o pae ma auli e le gata o totonu o aiga, aemaise ai le ekalesia, poo le matagaluega SISDAC a Kuiniselani. E iai e gasolo atu ae iai foi e gasolo mai pea i totonu ma faatupulaia ai pea le fuainumera ao le fatu lava e tasi ia maua le mafuta faatasi, fealofani ma le alofa moni ae sili ona faia mea uma e maualuga ai le Atua.
O le matafaioi a le Sosaiete Fesoasoani i tausaga uma, soo se tagata e moomia le fesoasoani, o iina e mafuli i ai le lagolago, o i latou o e mama’i, e le mafai ona misi le asia e le mafutaga e ala i asiga. E āsia falema’i ma falepuipui, o fesoasoani nei a le Sosaiete e faasafua mo soo se tasi ma totonu o aiga ae lē gata i lea o le tuu atu o le galuega alofa i nai aiga e mafatia i totonu lava o aulotu taitasi. O nisi o fesoasoani e aofia ai pusa meaai, o faatau ma ni seleni e tuuina atu.
O le aso faapitoa lenei e faatasi i le tausaga ma faataunuuina a le Sosaiete Fesoasoani, e lagiina viiga o le Atua, lauina le ripoti aua le silafia e le matagaluega ma folafola ni upu faalaeiau. O le susuga i le faifeau ia Pr Su’emalo Pa’u’u sa feagai ma le lesona, ae o le ta’ita’i o le Sosaiete, faletua ia Elisa Le’au Toso o ia sa folafolaina le upu, na vaevaeina ma lufilufiina e le failauga taumafa i luga o le la’oai e ala i le upu folafola, o se feau faamalosi’au, o se feau o le taimi ua tatou ola ai nei, o se taumafa e ma’ona ai le galala aua na toe faamanatu le taua o le tagata e loto mamā, ma ia fou le loto i taimi uma.
Na ia tautalagia le autu o le lauga ‘Ola Saoloto’, O le tāua o le Ola saoloto pe a tuu atoa lou soifua mo Iesu. O vaega uma o loo pologa ai le ola o le tagata e mafai ona foia pe a faalagolago mea uma ia Iesu.
O le Aotelega o le faamalosi a le ta’ita’i o le Sosaiete Fesoasoani le faletua ia Elisa Le’au na faamamafa i vaega nei:
(1) Saili Iesu – (a) Pa’i mautinoa, (b) Pipii ma le Alofa. (2) Tagata Fou – (a) Fou lau vaai, (b) Fou lau tautala, (c) Maua se loto fou, (d) Fou galuega a ou lima, (e) Fou lau savali. (3) Mavae mea tuai – (a) Faagalo, (b) Faamagalo, (c) Ola Faamaulalo. (4) Faafouina mea uma (a) Maua Iesu, (b) Saoloto i le Ala Fou e ola ai, (c) Fua o le Agaga – Kalatia 5:22-23
Na auai mai le faletua ia Ianeta Tuia ma le Sosaiete Fesoasoani mai Cairns na faisao foi matagofie a latou faafiafiaga. O le ta’ita’i lava ia Elisa Leau sa avea ma fofoga o le po.
O le po ina ua mae’a le Sapati na faia ai tauvaga muumuu, e tolu vaega na vaevaeina i ai le tauvaga, Tinā laiti, Tinā feololo, ma lauao sinasina. Na maua a latou faailoga. E iai sona tāua tele o lenei tauvaga ina ia faatāua ai ituaiga laei e onomea ma aulelei atili ai tina ia atili faamauaa ai pea mafutaga ma tamā ma fanau ma ia tumau ai pea lea fiafia i totonu o aiga.
Iuga o le tauvaga:
Tinā laiti – manumalo ai Felila
Vaega feololo – manumalo ai Lavalea
Aumatutua – Tina matua ia Talalelei
O faamasino, o faletua o le aufaigaluega, faletua ia Puataunofo Levae, faletua ia Ianeta Tuia, faletua o le taitai, Emo Matai’a faapea le faletua ia Teleise Ropati Talivaa mai Samoa
Auofisa o le Sosaiete Fesoasoani
Faifeau: Pr Su’emalo Pa’u’u
Taitai: Elisa Le’au Toso
Faatamā: Faamanu
Failautusi: Ema Mao Uka
Fesoasoani: Tuvao Siligi
