Le paia i le aumalaga mai Samoa a le alalafaga o Falelatai ma nisi o le mafutaga

Ua taunuu le faamoemoe o le alalafaga o Falelatai i le tusigaigoa i le Aso Toonai ua tuanai, lea sa faataunuuina i le Tiafau Hall a le ekalesia EFKS Southwest Brisbane.

E ui lava i le taugata o le soifuaga i lenei vaitaimi, peitai sa lei ‘alo lava i le ata o le laau nisi o toa, tupu ma tamalii, taulaga soifua, alo ma tamafanau faapea paolo ma gafa e malu ai lenei nuu i Kuiniselani. 

Na muamua ave mea i Matautusa e ala i le faamua i le Atua, lea na taitaia le sauniga lotu e le susuga ia Ps Tuivaiti Ieremia Ailao, Faafeagaiga Ekalesia AOG.

Na malaga mai sui o le ekalesia mai Samoa ona o le faamoemoe e fia saili seleni auā le maota o le galuega a le Ekalesia Katoliko i Samailauano i Falelatai. O le susuga i le fesoasoani o tausia le aulotu i Samoa, le susuga ia Tovia Iosefa ma le faletua ia Katelina.

Na o le 20 matafale na tapenaina lenei faamoemoe, e lē gata i lea o le lagolago a aiga ma uo faapea nisi ekalesia sa auai, ae tainane susuga i toeaiina ma faafeagaiga aemaise o faletua na faapea ona auai. Na faagasolo polokalame o le aso e ala i siva Samoa a matafale o le Mafutaga ae tainane foi le alofa foai o le auvalaaulia.

O nisi na malaga mai e aofia ai le taitai malaga ia Amitunai Sesilia Ioane Tuivaiti, Lupematasila Paika Ailao, Nanai Lui ma Veronika Nanai, Faasavalu Fosio Faasavalu, ma Siaana Ioane. O le failautusi lava o le mafutaga a Falelatai i Brisbane, Tuivaiti Ailao Tuivaiti sa fai ma Fofoga o le aso. 

O le Afioga ia Nanai Tailua Nanai sa feagai ma faaaloaloga.

Nisi o le laulau ma le mafutaga a Falelatai i Brisbane, Nanai Tua ma Tuivaiti Ailao faapea Elder Rev Tau ma Reeta, Rev Osa ma Faaiuga ma le paia o le mafutaga na opogi le faamoemoe

O se faamoemoe na faatumulia i le paia ma le mamalu o le atunuu, tatala le toga pa’ia e faimeaalofa ai le Mafutaga ma le aumalaga e talimasinei ai le aao foai o le auvalaaulia. E $71,000 le aofaiga o le aao foai auā le mauga o le Atua.

O le laulau i Kuiniselani: 

Taitai Fono: Galumalemana Iuni Tuimalealiifano

Failautusi: Tuivaiti Ailao Peletiso Tuivaiti

Teuoloa: Nanai Anae Leitutua Nanai

O nisi nei o lotonuu o i totonu o le mafutaga e aofia ai Ps Misa Pogi, Misa Loli, Sila Ulisese, Lumatasila Asotasi, Lupematasila Ale, Nanai Tailua, Nanai Livi, Nanai Sopoitu, Anae Tausagafou, Faasavalu Mefi, Tagoiaega Lelava Fuifui, Rev Pereleini Tauilo, Sanele & Keseta, Nanai Afa, Faasavalu Lalomaoa, Tuivaiti Ailao, Nanai Leitutua, Galumalemana Iuni, Ps Ieremia Tuivaiti.

Na faamalieina finagalo o le auvalaaulia i le lava tapena o le taumafatagata na tapenaina e le Uncle Sam’s Catering, Toleafoa Papalii ma Lona Mata’utia. Na momoli foi le agaga faafetai o le mafutaga a Falelatai i Kuiniselani ia i latou uma na agalelei ma foai, ma le tatalo ia saga sautuaselau manuia o le Atua i aiga, auauna a le Atua faapea ekalesia, uo ma ē masani. 

Ua faamoemoe o le a toe taliu le faigamalaga i Samoa i le isi tolu vaiaso o lumanai.