(Malamalama i le tulaga auauna o le tagata i le Atua)
Ua avea le faatupulaia o le atamai faasaienisi ma poto faanei ona po, ua mafai ai ona fausia nisi fausaga ua lu‘iina ai le mau, o mea uma i le lagi ma le lalolagi na faia lava e le Atua. Ua faaaogā foi e le tiapolo le tomai lea e aveese mai ai le tagata faatuatua mai le mea o loo talitonu i ai aemaise lona tulaga auauna i le Atua.
“O le auaunaga a le tagata i lona Atua e 24 itula, ae o se tagata foi e fia ai fia inu e tusa ma lana galuega o loo fai”, o nisi ia o upu autu o le lauga a le susuga i le ositaulaga Pastor Moli Iakopo o le ekalesia Samoa Unity Hoon Hay, i le sauniga o le lotu tuufaatasi ma Bromney i le aso sapati ua mavae, aso 7 Mati 2010 lea na faatasia ai le mamalu o aulotu e lua i le Bromney Community Centre.
O le Samoa Unity Church ua tusa ma le ono tausaga talu ona faatuina i Kalaiesetete, ma e tai lua masina ma fai a latou sauniga tuufaatasi e faamalosia ai le mafutaga faa-Kerisiano o aulotu e lua.
E pei ona auai atu i ai le sui o le nusipepa i lenei sauniga tāua, ma maitauina ai le tulaga toatele o le mamalu o le atunuu o loo tapuai ai, aemaise ai le fanau tupulaga ma fanau laiti.
O le susuga ia Eneata Toilalo ma le faletua o Fara (Fagaloa & Vaivase) o loo vaaia le aulotu i Bromney, faatasi ai ma Pastor Milo Iakopo ma lona faletua o Maria (Patamea & Gagaifo Lefaga) o loo taitaia le aulotu tele i Hoon Hay.
O le masina fou o lea faapea ona malaga atu ai i Samoa le susuga i le faifeau ma sui usufono mo fonotaga a le ekalesia Samoa Unity, ma o lenei lava sauniga tuufaatasi sa faamautuina ai tapenaga aemaise o se luitau faaleagaga mo le aulotu a o loma fonotaga.
E pei o le autu o le ulutala, tatou te le lufilufia le laoai sei sau le tama, o loo saunoa faatatau le susuga i le faifeau i le filifilia o Tavita e avea ma tupu, na aami lava Tavita a o leoleo mamoe i le vao.
E filifili e le Atua le tagata e loto maualalo, o le auauna e faalogo ma usitai, e vaai le Atua i le loto ae lē o le malosi, poto, mauoa pe aulelei.
Na alo atu le ekalesia i le sakarameta o le faamanatuga ma faaiu ai i le tolaulauina o aso soifua o le masina o Mati, ma e alu lava le tagata ia i luga e ta‘u mai lona aso fanau sei vagana ai fanau laiti.
Na maitauina e le tusitala le tina o Oliula Iosefa (Fusi Safata) ma ona alo e toatolu, Noa 15 tausaga, Sau 10, ma Sasa 3 tausaga na soifua uma lava i le masina o Mati ma sa usu fiafia e le aulotu le pese faamanuia o le aso fanau, ae o loo faatalitali pea nai tamaiti i ni meaalofa.
Na saunoa faaiu le susuga ia Milo Iakopo, e faaifo mai lagi manū o le feau ma ia faalogo ma usitai i le Atua, ma ao ina manatua le tulaga auauna o le tagata i lona matai.
