Faamanatu le tamoega a le Hash Harriers i se foai

O le vaiaso ua tuanai na faamanatu ai le tamoega lona 1500 a se vaega o tagata Samoa ma tagata papalagi ua nonofo i le atunuu i le foai atu lea o se tinoitupe e $3000 mo le Faalapotopotoga o le Nuanua o le Alofa, lea o loo avea ma ofisa tutotonu o mataupu e faatatau ia i latou e iai manaoga faapitoa. O lenei foai ina ia mafai ai ona faatino nisi galuega moomia a le Faalapotopotoga i lona ofisa tutotonu lea i Mulivai.
O lenei tamoega na faamanatu ai le laasia o lenei foi taumafaiga e fai i vaiaso uma a le Hash Harriers a Apia – o se kalapu o soo se tasi i Samoa e fiafia e tamoe.
O le atu Faleata na faatino ai le tamoega lenei ma na ta‘ua e lē o loo faatamā i ai lenei kalapu, o Tuatagaloa Joe Annandale, e le gata o se auala lenei ua mafai ai ona maua le faamalositino i vaiaso uma, ae o se auala ua mautu ai faigauo ma le va galulue faatasi o i latou ua ofi mai i lenei kalapu.
Na amata e le afioga Tuatagaloa Joe Annandale ma nisi o alii papalagi na galulue i Samoa lenei taumafaiga ma e oo mai i le taimi nei ua na o le afioga Tuatagaloa o loo totoe mai o i latou na amataina lenei taumafaiga i le 29 tausaga ua tuanai.
Faaalia e le Faatamā o le Kalapu le toatele o tagata Samoa lava ia ua ofi mai i le Hash House Harriers a Apia e pei ona faaigoaina ai, ma ua oo atu i le 6000 kilomita ua aofia o eleele o Samoa i lenei taumafaiga.
E tamomoe lava i Aso Gafua taitasi lenei kalapu ma e eseese lava vaega o Samoa ua latou tamomoe ai, o nisi o nofoaga e toatele e lei oo i ai.
O le matagofie o lenei taumafaiga, e pei ona saunoa i ai Tuatagaloa ona o le mafai ai ona vaavaai foi i latou nei o loo fiafia e tamomoe i nisi auala e fesoasoani ai i le lautele o le atunuu. E pei ona iai le foai lea na tauaao atu i le faamanatu ai o le tamoega lona 1500 a le kalapu.
O le Peresitene o le Nuanua o le Alofa le susuga Nofovaleane Mapuilesua na talia lenei foai – o le $1,500 (tala) na foai lava e le kalapu ae na faaluaina e le afioga Tupua Fred Wetzel, o se tasi o lagolago malosi a le kalapu tamomoe lenei, ma o lona maota foi na fai ai le fiafia e faamanatu ai le laasia e le Apia Hash House Harriers o le tamoega lenei.
O le meaalofa lea na ta‘ua e Tupua Fred ua ofo atu e lana kamupani le Apia Concrete Products i Vaitele.
Na faafetaia e le Peresitene le foai ma ta‘utino o le a faaaoga lelei i manaoga i le taimi nei a lea ofisa ua faatuina o se faalapotopotoga tumaoti i Samoa.
O le mae‘a o le tauaaoina o le foai na amata ai loa faafiafiaga e pei foi ona lauiloa ai lenei kalapu, i le malosi o le tamoe toe malosi foi ma le inu o tagata. Na saunia e sui tamaitai o le Kalapu ni faafiafiaga faapolenisia auā lea afiafi ae o le tele lava o taaloga na faatautaia e alii. Na tufatufa ai ma faailoga faapitoa ia i latou uma na auai ma tamomoe ai i le faamanatuina o lea aso tāua mo lea foi kalapu o taaloga i le atunuu.
Na manatua ai foi i lea fiafia le tina ia Tui Annandale, na maliu i le sunami o Setema 2009 – o se tasi o sui faavae o lenei kalapu i le atunuu.
O le vaiaso foi lea na tea nei na faatautaia ai se tamoega a lenei lava kalapu mo le asosi o loo nafa ma le faalauiloaina o le gasegase o le kanesa i Samoa.