“O fautuaga e fai ma sei, a o upu o le alofa e fai ma avei”
Ua logo i, logo a galuega a tina, gapatia i aso uma aemaise o le mamafa ma tiga uma latou te tauaveina ma saga molimau ai pea le alofa faatina i totonu o aiga, nuu ma ekalesia aemaise le latou fautua mo se manuia.
O le Aso Faraile na faatoa mavae atu nei na ausia ai se tasi o matatia fou i totonu o Kalaiesetete mo le faatāuaina lea e tamaitai ma tina Pasefika, o le magafagafa e mataitu ai le siakiina o lo latou soifua maloloina e ono puipuia mai ai i le faamai sasao o le kanesa, lea ua tele ina maimau ai le soifua o tina o le lalolagi.
O le polokalame o le National Cervical Screening mai le matagaluega o le Canterbury District Health lea ua leva ona faatautaia i totonu o Kalaiesetete, ma o loo galue ai se tasi o alo o le atunuu, Sharon Aito‘a Malietoa, ma ia amatalia ai le mamanuina o se uluai mitiafu i le motu i Saute e faalauiloa ai le tāua tele o le mataala o tina Pasefika uma e fai o latou siaki mo le puipuia mai i aafiaga o le faamai o le kanesa.
Na faataunuuina lenei faamoemoe i le hall a le Ekalesia Papatiso ma amatalia i se tatalo puupuu na saunia e Pastor Derek Tait mai le Destiny Church, ma e toatele tina ma tamaitai Pasefika na auai, faapea nai tamā sa lagolagosua ma ua faapena ona tepa i ula ma felanulanuai matagofie ai lea afiafi.
O alo tamaitai o le atunuu, Melisa Stanley (MPIA) & Maria Lemalie (Canterbury University) sa fai ma fofoga o le aso e faasoloa polokalame, ma sa faapea foi ona auai malo faaaloalogia e pei o Anne Moetaua, faufautua sinia (Pacific Strategic Adviser – Health) faapea Bev McVicar (Manager National Cervical Screening – Canterbury Health Board).
E loloto ni saunoaga matagofie sa faalaeiau ai sui tofia o le matagaluega o le soifua maloloina, ma laua faamamafaina ai le tāua tele o le faaavanoa o le taimi o le tina, na o le faatasi i le tolu tausaga ona alu atu e siaki, ae na o sina lima minute foi e faamaimauina o lona taimi, ae o le lima minute pito sili lea ona ogaoga o lona soifua.
E pei ona faamatala auiliili mai, o tina ua faatusa i penina tautele o le Pasefika, na fofoa mai i totonu o le faisua ma ua tupu ma ola ifo i ni foliga aulelei ma le matagofie, ua faapena tina Pasefika, ma o se faamaumauga faafuainumera e faapea, e oo atu i le tausaga 2050, o le limasefulu pasene o le faitau aofai o tagata Niu Sila (population), o tagata Pasefika.
Na ta‘ua e le tamaitai o Sharon Malietoa, o se lagona na oo ane ia te ia e mamanuina se mitiafu a o taoto i le moega i le po, i le masina o Novema 2009 ma ia manatua ai ma le faafetai se tasi o tina lototele o le atunuu, Edith Ieremia (o le tuaa o le tamaitai faasalalau televise o April Ieremia), o ia lea sa faamalosiau ia te ia i lana galuega aemaise o se tinā ua avea ma faaaoaoga lelei mo tinā ma tamaitai, a o feagai ai ma le gasegase o le kanesa. Na faapena foi ona saunia se keke matagofie e tatala aloaia ma faamanatu ai le aso fanau o le uluai mamanu o le aute, o le fugalaau e sasala i loto, ma e lē atoa foi se fiafia ma se matagofie o se aiga pe a leai se tina.
Na faamalieina ē na auai i faafiafiaga matagofie a le ausiva mai Rarotoga, e pei foi o aso faapenei e sue lava le paga a le valaaulia, ma sa matua tamure ai le alii faasalalau o le Penina o Samoa mai Kalaiesetete, o loo galue foi mo le tatou nusipepa, le alii o Pio Liaina i lea foi aso tuupoina, aemaise ai o le gasolosolo ane o tausala o loo laeiina le mitiafu, e faalauiloa ane i le valaaulia.
Na faaiu i le taumafataga matagofie na saunia lelei mo le soifua maloloina, leai ni ova pauna e maua ai ona taape ai lea o le aofia ua malie o malie malo, saō faalalelei lenei aso manaia.
O le fautuaga i tamā aemaise itupa o alii, ia outou toaaga e faamanatu i tina a latou siaki mo le soifua maloloina lelei ina ia umi ai pea le mafutaga vavalalata.
