E le i lalo ifo o le toalima sui faipule tamaitai ua avanoa ona ulufale i le Palemene o le atunuu pe a faatino le faigapalota tele a Samoa i le tausaga e 2016. O aiaiga ia o le teuteuga o le faavae ua pasia e le Fono Aoao Faitulafono poo le Palemene o le atunuu e pei ona faamauina lona talia e sui usufono uma e 48 i le masina o Novema o le tausaga ua mavae 2013.
O le finagalo fulisia o tina ma tamaitai o le atunuu na auai i se faatasiga sa taloina e le Fofoga Fetalai ma le ofisa o le Fono Aoao, ua tatau ona maua se toa sefulu o tamaitai o le atunuu e ulufale i upufai o le Malo ma le atunuu e ala i tofi faipule o itumalo faafaipule.
O le tauaofiaga mo tina i Upolu na faia i le potu mo fonotaga faavaomalo i le maota o Tui Atua Tupua Tamasese Efi i Sogi, na molimauina le faatumulia i tina ma tamaitai. O se faatasiga na autu i le faamalamalamaina atili o teuteuga o le faavae i le filifilia o ni faipule tamaitai.
O le afioga Maiava Visekota Peteru o se tasi o tina o le atunuu na avea ma faipule mo le itumalo o Aana Alofi numera tasi i se tasi o paeaiga ua mavae a le Palemene.
O ia o se tasi o fofoga o le aso na tauaofia ai tina o Upolu lea na manino i lana folasaga e lē faigofie le tausinioga i le va ma le itupa o alii.
Saunoa Maiava, o nisi foi itu e faigata ai ona e manatu lava tina o latou e faamuliga i ai ni filifiliga ae o le tofi faipule lava ia o se mea na o le itupa o tane.
“Ou te fai atu tina o Samoa ua tatau ona iai se suiga i o tatou lagona o loo taotaomia ai o tatou avanoa.
Ou te tautino atu foi lo‘u faafetaia o le afioga i le Palemia ma le Malo i le aumai o lenei avanoa faaauro mo tatou ma aua ne‘i o tatou melea”.
O aiaiga o le faavae e mafai ona faaaogā se pasene e filifilia ai se faipule tamaitai ina ia maua le toalima o faipule o loo manaomia e le faavae, peitai afai lava e sao mai tamaitai i le palota silia, maua ai le toalima ma sili atu, e lē taofia i aiaiga o le faavae.
O le afioga i le Sui fofoga fetalai le tofa Agafili Patisela Eteuati, na ia faamalamalama i le tauaofiaga a tina i Tumua, matafaioi ma tiute o faipule aemaise o galuega ma malosiaga o le Fofoga Fetalai lea o loo pule tutasi o ia i le Palemene, e lē faaituau le faiga o ana faaiuga.
“A fai atu lava le Fofoga Fetalai i le Palemia e tulai ese ma le fono, e tulai lava ma o le pule tutasi lena e umia e le Fofoga Fetalai”.
O le amataga o le vaiaso na tea nei na faia ai le uluai faatasiga lenei ma tina o Salafai lea sa faia i le maota poo le hall a le EFKS i Spapalii.
O mataupu foi ia na faamalamalama ai, ae o le finagalo faaalia o tina i Puleono, o se teuteuga lelei tele ina ia siitia ai le leo o tina ma tamaitai i tonu fai o le Malo ma le atunuu.
O le vaiaso nei e faaiuina ai lenei faamoemoe i se faatasiga a tina o Upolu ma Savaii e faia i le taimi o le a usuia ai le Palemene i le vaiaso nei.
