E tele polokalame tau aoaoga o le a amata tatala o latou faitotoa i le tausaga fou, ae o le a tele ai foi avanoa e faamanuiaina ai alo ma fanau a le atunuu, ina ia toe tapue atili o latou tomai eseese tau aoaoga, auā lava le faatapena atu ai mo nisi tomai tau galuega mo se lumanai lelei.
O se tala fiafia ona o lea ua faasilasila aloaia mai foi se isi polokalame tau aoaoga fou, a le Auckland Institute of Studies poo le AIS, ua faamaonia aloaia nei e le matagaluega o loo faatulagaina tomai tau aoaoga mo tusipasi maualuluga i Niu Sila, le NZQA, ua mafai e le AIS ona faatulaga se latou polokalame e aoaoina ai tomai e faauuina ai se tasi i le tusipasi Diploma in Hospitality Management.
O lenei tusipasi e tasi le tausaga e faagasolo ai ona aoaoga, e 120 togi poo credits e tatau ona ausia i le Level 7, e ono vasega (courses) o le a vaevae ai le aoaoina, ma e fetaui lelei mo i latou o loo mananao e maua tomai i lea foi matata i galuega faatalimalo (hospitality industry) aemaise lava i luga o tofiga e vaaia pe pulea le faatinoga o nei galuega.
O se tomai ua mautinoa le telē o lona moomia i galuega faapea faatalimalo i Niu Sila ma Ausetalia ma le lalolagi atoa, ma o le itu lea o loo faamatilatila e le susuga Hamish Small, o ia le Faauluuluga o le Hospitality Management i le AIS, i le mautinoa e vave tele ma lelei galuega e maua i lenei tomai pe a faauu mai le polokalame lenei a le AIS.
O le aso 8 o le masina lenei o Tesema lea na faalauiloa ai lenei polokalame fou a le AIS, ae ua iai le faamoemoe o le tausaga fou, 2015 o le a amata aloaia ai loa vasega mo lenei tusipasi tāua.
O le silasila mamao lea a lenei aoga, ua latou mautinoa a o faagasolo taimi, o le a matuā telē se manaomia o lenei tomai i le itu tau galuega, o le ala lea na latou tapena ai ma saili se faatagaga mo le amataina o ni aoaoga mo lenei tomai, ina ia faasoa atu agavaa tatau mo fanau ma i latou uma o le a maua le avanoa e aooga ai, auā lava le mauaina o ni galuega lelei i lenei matata.
E lua vaega poo kulupu o tagata aooga o loo taulai i ai le polokalame a le AIS. Muamua o i latou o loo galulue pe ua iai le atamai i nisi tomai tau galuega, ae o le a mananao e toe suesue ina ia iai se tomai i le puleaina poo le vaavaaia o galuega nei tau faatalimalo.
Lona lua, o i latou ua leva lava ona galulue ai i lenei tomai, atonu o se poto masani na maua mai ni mea na galulue faataitai ai, ae o lenei la o le a maua se avanoa e faaaloaia ai loa sona agavaa ma faamauina i se tusipasi; auā o le ausia o se tusipasi, o le faitotoa foi lea e toe tatala atu ai i nisi avanoa mo nisi aoaoga maualuluga atu i lenei lava tomai.
E pei ona ta‘ua, e tele avanoa faigaluega o le a maua e i latou e faauu mai lenei tusipasi, o galuega i le puleina ma le faatulagaina o mea i totonu o faletalimalo, i le faatulagaina o potu ma apitaga, o galuega i ofisa malaga, e maua ai foi tomai i le faalauiloaina poo le maketiina o ni pisinisi, le faamaopoopoina o ni faamoemoe tetele, o le faafeiloaia o tagata e afea ni ofisa, o le itu i le fuafuaina o le faatauina o le ava malosi; ma isi lava galuega faapena.
O le a amata le aoga i le 2015. E 3 vaitau tau aoaoga (semesters) ae ta‘i 14 vaiaso i le vaitau tau aoaoga e tasi.
Vaitau 1 e amata i le aso 2 o Fepuari, Vaitau 2 e amata i le aso 25 o Me, ma le Vaitau 3 e amata i le aso 14 o Setema.
E maua uma le atoaga o faamatalaga i lenei polokalame fou tau aoaoga, pe a saili atu i le latou upega tafa‘ilagi http://www.ais.ac.nz/programmes/hospitality-management/graduate-diploma/ pe faafesootai le susuga Shane Ball, Marketing Manager AIS i le imeli: shaneb@ais.ac.nz. Telefoni: 021 680 618.
