“Manatua foi ole mea lena oute faamanatu ai pea ia Ausetalia ma Niu Sila sa tatau ona fiafia o lea ua lave mai Saina i lena vaega auā pe ana leai le alofa foi o lena Malo semanu o mea ia tatou te agai ai ia Ausetalia ma Niu Sila. E eseese foi tulaga o fesoasoani, o mea ia e fesoasoani mai ai Saina e lē o aofia i totonu o fesoasoani a Ausetalia ma Niu Sila”.
Ua saunoa foi le afioga ile Palemia susuga Tuilaepa Lupesoliai Sailele Malielegaoi e lē faia i fesoasoani a ia Malo e lua oloo lalata mai ia Samoa le faia oni fale tetele mataaga ma malae taalo.
O aso ma tausaga ua mavae sa talosaga ai Samoa e fesoasoani mai Ausetalia ma Niu Sila ile fausia o ia ituaiga o galuega tetele peitai sa tali mai o mea ia o galuega e palasi tonu ile Malo o Samoa. Na toe fesiligia le Palemia ole atunuu ile mataupu i fesoasoani a Saina ma le vaavaai mai ia Samoa o Niu Sila ma Ausetalia ona oloo iai le lagona o ia Malo e lua ua mamafa tele fesoasoani a Saina i atunuu ole Pasefika e pei o Samoa.
“Ua lilifa tele le vaai i mea ia ma le manatu oni mea oloo fai faalilolilo, lea sa ou toe faamanatu iai ole tolu tausaga ua mavae sa iai uma lava taitai ole Pasefika e iai sootaga faapitoa ma Saina, sa iai foi ma le taitai ole Malo o Initia, ma sa sau le Peresetene o Saina ma ta’u mai oloo iai le fa piliona e mafai ona agavaa iai malo e iai sootaga ma Saina”.
Faaalia e Tuilaepa o ia feiloaiga ma ia taitai o Malo o Saina ma Initia sa faia i Fiti ile tolu tausaga ua mavae, ma o aiaiga o fesoasoani na folafola e Saina e lē o faalilolilo. Na saunoa Tuilaepa ole galuega ole malaevaalele faavaomalo i Faleolo oloo faatupe e Saina na ia matauina ai e pei ua silasila mai malo i fafo e pei oloo iai ni mea faalilolilo ale Malo o Samoa ma Saina.
O fesoasoani a lea Malo na folafola i atunuu ole Pasefika oloo tuusa’o iai talosaga a Samoa pe maua ai se fesoasoani e lē gata o meaalofa poo grants ae o nonogatupe e māmā tului. Na faamanatu foi e Tuilaepa i taitai o Malo Ausetalia ma Niu Sila oloo iai foi feiloaiga a taitai o atunuu ole Pasefika ma taitai o Malo Farani ma Iapani ma o ia foi feiloaiga e fofola mai ai atina’e e mafai ona fesoasoani iai ia Malo tetele.
Ole malaga talu ai nei ale Palemia o Niu Sila o Jacinda Ardern i Samoa sa fesiligia ai e tusitala i sona finagalo i malo laiti ole Pasefika e pei o Samoa oloo fai paaga ma Saina ma fesoasoani oloo sasaa mai ai. Ole finagalo o Ardern e nate lē aiāina tonu fai ma fuafuaga a soo se malo ole Pasefika ma ole latou lea faitalia.
Ua faaalia e Tuilaepa ile feiloaiga ma tusitala a’o iai i Samoa le Palemia o Niu Sila ma lana aumalaga, o Samoa e alu sa’o lava ana fuafuaga i fesoasoani e folasia mai e Saina ma e usitaia foi aiaiga o ia fesoasoani.
Ole atugaluga taatele oloo faaleo i manatu ma finagalo faaalia ile mataupu ile lalata mai o Saina ile Pasefika ole fai fai o ia sootaga ma fesoasoani oloo inu ai atunuu ona faaono avea lea ma faitotoa e pulea ai e Saina ni Malo ole Pasefika. Ole mau a nisi e lagolago i fesoasoani a Saina e lē mafai ona tupu se tulaga faapea i Samoa.
