O Komesina e toatolu mo le Komisi a tagata faigaluega ale Malo poo le PSC (Public Service Commission), ua seei mai ai nei i latou sa avea ma Ofisa Sili o nisi o Matagaluega ale Malo, ae ole mae’a ole ono tausaga o tauaveina le tofiga Taitaifono ole Komisi e le tofa Tuu’u Ietitaia Taule’alo, o lea ua see atu iai le susuga Aiono Mose Su’a e avea ma taitaifono.
Ua filifilia ai foi ma le tofa Auelua Samuelu Enari e avea ma se tasi o sui ole Komisi e sui tulaga ile faletua le afioga Safuneituuga Paaga Neri Fepuleai, ua mae’a foi le ono tausaga sa tautua ai ose Komesina. Ole Faletua o Vaosa Epa faato’a mae’a le tolu tausaga o lona taimi muamua ma oloo faaauau pea e pei ona toatolu ia te ia ma le susuga Aiono Mose ma Auelua Samuelu Enari, Komesina ole Komisi.
Ole pitolaau a Komesina e toatolu ole unaia o galuega mo le siitia ole tautua a tagata faigaluega uma ale Malo. Ole isi foi o latou tiute ole saili o fofo e togafiti ai ni faaletonu e aafia ai tagata faigaluega, aemaise ole pitolaau tāua ole saili o auala eseese e a’oa’oina ai tagata faigaluega ale Malo. O lu’itau ia na folasia e le afioga ile Palemia o ia ole Minisita ole PSC le susuga Tuilaepa L Sailele Malielegaoi ina ua saunoa e faafeiloai le Taitaifono fou ma le sui fou ole Komisi.
Na saunoa le Minisita ile tele o vaega e moomia ai le mataalia o tagata faigaluega ale Malo ile faatinoga o latou tiute aemaise oi latou ua umia faailoga ma tomai faapitoa atoa ai le poto masani e faatino ai le tautua.
Na oo le saunoaga ale Minisita i falelēta’ua poo toilets ina ua agai atu mo le faafeiloaiga ole Taitaifono ma le sui fou ole Komisi, ae na afe muamua ile falelēta’ua ole Maota o Tui Atua ile vaega o iai le maota mo fono ma faatasiga tetele. Na faaalia e Tuilaepa ole mea e ofo ai oloo silafia e i latou o vaaia le fale oloo iai sauniga e toatele tagata e auai ae oo atu ile falelēta’ua e leai se pepa.
Na oo ai ma le saunoaga ale Palemia poo le Minisita ole PSC ile tauvaga ole faamamāina o falelēta’ua o matagaluega ma faalapotopotoga ale Malo a’o avea ma Minisita o Tagata Tafafao. Na faamatala le Palemia ose tauvaga na iloa ai le faainaelo o nisi o matagaluega ale Malo e pei ona sa maua e le Matagaluega ole Soifua Maloloina le faailoga muamua ole matagaluega ale Malo e pito faainaelo i falelēta’ua.
Ole aotelega ole folasaga ale Palemia ile faafeiloai ai o sui fou ole Komisi ona o isi ia vaega tāua e tatau ona silasila iai tagata faigaluega ale Malo ole tumamā lautele, auā o lana saunoaga o mea itiiti e lē manatu mamafa iai e avea ma lape ile aotelega atoa o tautua lelei oloo latou faatino mo le atunuu.
Ole susuga Aiono Mose Su’a e tofia nei e avea ma Taitaifono ole Komisi ua malolo litaea mai ile tofiga Ofisa Sili ole Matagaluega ole va i fafo ma fefaataua’iga, ae ole tofa Auelua Samuelu Enari sa avea ma Ofisa Sili ole Matagaluega o Pisinisi Alamanuia ma Leipa.
Ole faletua o Vaosa Epa sa avea ma Ofisa ole Matagaluega ale Palemia ma le Kapeneta.
