Tusa pe aumai le masini faaonapo nei mai Korea e vave ai ona maua faaiuga o faigapalota, e lē mafai lava ona faatagaina ai le palota mai o tagata Samoa i fafo atu, e pei o Niu Sila ma Ausetalia, poo isi atunuu mamao.
Ua faamautu mai ele alii pule ole Ofisa o Faigapalota, Faimalomatumua Mathew Lemisio, “ole tulafono, oloo tumau lava, e tatau lava ona e afio mai i Samoa e faatino ai lau palota.”
Ua viia ai e le taitai ole malo, Tuilaepa Lupesoliai Sailele Malielegaoi galuega faalauiloa ale pulega ole ofisa faipalota o faagasolo ai nei mo le silafia o tagata palota, aemaise ole faatāuaina lea o lau palota e ala ile filiina o lau faipule.
Na faafetaia e le afioga ile Palemia le Komesina o faigapalota, ile mataalia, ma le taumafai e faaleleia le faiga o palota. O galuega faalauiloa ale pulega ole ofisa o faigapalota, e aofia ai le aumaia ose masini mai Korea e faafaigofie ma vave maua ai faaiuga o palota, peitai o itu uma na ole faaleleia atili o lea foi matafaioi ale ofisa faipalota ile talitonuga o Tuilaepa: “A talanoa ile faaleleia atili, ia mafai ona sau le tagata i totonu, ua fulisia iai le aufaipalota ose itumalo. Ose filifiliga sa fai saoloto, ma le talitonuga e puna ane ile agaga, ae lē ose mea fai faamalosi. Ma ole agaga foi lena ole malo, ma taumafai iai le Komesina, ma le vaega faaupufai lenei, ia vave ona maua le faaiuga sa’o, auā o mea na e fai e isi malo.”
Talanoa Faimalomatumua, “sa masani ai e tai atoa le 10 minute o tau sue ma faatino le faiga ole lesitala. Peitai ole faaiuga ole masina nei, e amata ai ona omai tagata tomai faapitoa mai Korea e a’oa’o mai le faaaogāina ole masini lea. Ole masini lea e scan ai lou finger print ma maua mai loa lou ata, auā o Samoa e tali tutusa igoa o tauaiga, fanau ma mātua. Ole masini lea e foia ai le palota faalua. Ae ole palota o lou suafa mai fafo, e lē mafai ona iloa atu ai oe ile masini lea.
Ae ole faiga o lau palota, e lafo atu loa lau pepa palota, ona faavasega lea e le masini. A oo ina tapuni falepalota, na’o le oomi lava ma faitau mai e le Masini le tagata ua e palota iai. Mo Samoa e lei atoa se 20 afe tagata palota, e vave lava pe a faatusa i isi atunuu e tai fia miliona.”
Talanoa le Palemia, “o malo saoloto nei, e pule ai le tagata i lana aiātatau, auā e fai loa (se mea sese) tautala loa le tagata.
“Ae ua taoto foi tulafono, a e tautala, e lē ose solitulafono le mea lena, o mea faapenei, o tulafono mo latou oloo i fafo, e lē o atoa so latou tolu tausaga, oloo faagasolo pea. Ae ole tatalo, ia aua aua aua ne’i tulai mai se faigamalo e tulai mai ma latou suia le tulafono lea. E tatau ona e sau e atoa se tolu tausaga, e faamasani ma iloa lou itumalo, ma mea e manaomia e latou, aua ne’i pulea mai tua aiga ae vaai i tagata oloo tau malae.”
Talanoa tupulaga i faigapalota
E talitonu Faimalomatumua, “Ose ‘ai lena ole faalauiloa ale Ofisa o faigapalota na faatāua ai tupulaga talavou ile tausaga lenei. Ina ua molimauina i luga o upega tafailagi, le amata ai nei ona talanoa tupulaga, faatusa i aso ua mavae, sa na’o tagata matutua lava sa talanoa agai ile palota, ma sa na’o le vaitau lava o faigapalota e talanoa iai tagata, a uma atu foi ma mou atu ai lava. Ae ua telē se suiga i nei aso i talavou, ua latou faaaogā upega tafailagi e talanoa ai ile mataupu. Ma ose ‘ai lena ole faalauiloa o lenei tausaga.”
Ua faaaogā ai nei foi e le pulega o palota, nisi o manatu na lagalaga mai e fanau talavou, ma ole a fesoasoani tele lea ile pulega o faigapalota, ile faufauina o polokalame faalauiloa oloo faagasolo ai nei.
