Ia i le Atua pea le viiga e faavavau, faavavau lava, ona o le faamoemoe ua taunuu, o le laau o le soifua lea.
O lenei ekalesia o loo taitaia e le susuga i le Faafeagaina Kuki ma le faletua ia Lupe Aloalii.
O le faamoemoe maualuga o lea vaega o le galuega; o le faaaogā o lea foi auala faaneionapo, e latou te tala‘i atu ai le finagalo o le Atua, ma faatalaleleiina ai nisi agaga mo lona malo o loo fausia.
O le a mafai foi ona fesootai atu ai e le gata i isi lala o lenei ekalesia, ae o le avanoa e faalauiloa ai le itu faapisinisi o le galuega.
O lenei mataupu sa faafoeina e le taulealea ia Vaituutuu Junior Laauoleola. I ni tausaga ua mavae sa faauuina ai lenei alo o le ekalesia ma ia tauaaoina le tusipasi o le Diploma in Graphic Design, ma ua mafai ona faalauiloa lana taleni e faaaogā i totonu o le ekalesia, aemaise meafai o aiga. Sa galulue le susuga ia Vai ma Logo Lesatele i le faataunuuina o lenei faamoemoe, aemaise le kamupani sa lesitala ma faaolaina le Upegatafa‘ilagi, i le susuga ia Lui Tusani ma le Website Robots.
E le gata o le tatalaina o le Upegatafailagi a le ekalesia, ae sa maimoa foi le mamalu o le valaaulia i faafiafiaga i lena po, e pei o le ausiva a le Tatau o Samoa, Barbershop Quoter, Rubberband, ma faailoa ai foi pokalame a le Au talai (Outreach Team) a le ekalesia sa sauni atu mo le Fonotaga a faifeau i Melepone (Melbourne) e pei ona agai atu ai i le vaiaso talu ai.
O se vaaiga matagofie sa maitauina i lea po, ona o le faatumulia o le faletele(hall) a le ekalesia, i le toatele o le aufaigaluega mai nisi o ekalesia i totonu o Aukilani nei, faapea ma faafeagaiga asiasi mai si o tatou atunuu o Samoa.
E le gata i lea, ae o le auai ai o le tamā ta‘ita‘i ma le faletua, Pastor Kuki ma Lupe Aloalii, le mamalu i faifeau lagolagosua ma o latou faletua, o Ao sinasina o le ekalesia, faapea le lasilasi o tauaiga, uo ma ē masani a lea lava aulotu.
