O le saunoaga a le taitai o le Malo i le alii Palemia i le tauaofiaga lona 67 a Malo Aufaatasi o loo usuia nei i le nofoaga tutotonu i Niu Ioka i Peletania na ia faailoa ai i le fonotaga sa autū i le faamamaluina ma le tausia o tulafono, o Samoa o loo malosi pea ana pulega faamatai talu mai le 3 afe tausaga ua mavae, faaopoopo i ai ma le galuega a leoleo, auā e leai se malosi faafitafita o le tatou atunuu.
Na faailoa ai foi e le Palemia, Susuga Tuilaepa Lupesoliai Sailele Malielegaoi, le faatinoina e le Malo o ana faiga faavae e faamalosia ai tulafono e pei ona faatuina le Komisi mo le toe fuataina o tulafono.
O le tuualalo a le taitai o le Malo ua folasia i le fonoatag lenei, o le tatau i Malo uma o loo avea ma sui o Malo Aufaatasi ona ausia tulaga maualuluga uma i le faamamaluina ma le tausia o tulafono le Rule of Law, ma ia tausolomua i Malo Aufaatasi ona saga faamalosia pea ia vaega, ina ia ogatasi ma ana manulauti o loo tala‘iina pea.
Ua faailoa ai foi e le palemia i lana saunoga le tuu atoa o le lagolago a Samoa i galuega a Malo Aufaatasi o le puipuia o le filemu i le lalolagi, e pei ona toagaogao le auaunaga a le matagaluega o leoleo a e faasaosao lava ni alii ma ni tamaitai auā le faataunuuina o manaoga o Malo Aufaatasi mo lea vaega tāua.
O le 30 pasene o tamaitai leoleo mai Samoa e pei ona faaalia e le Palemia, ua ausia le oo atu e faatino ia tiute o le tausia o le filemu e pei ona galulue ai nisi o malu o le Malo i atunuu e pei o Sudan, Timoa i Sasae ma Solomona.
O le taualuga o le saunoaga a le taitai o le malo na ia faailoa ai i usugafono le talia e Samoa o lona lagolagoina o teuteuga o le maliega mo le faamalosia o galuega a le faamasinoga mo soligatulafono faavaomalo le International Criminal Court.
E pei ona silafia e lo tatou atunuu faitau nusipepa o se tasi o tamalii o le atunuu le susuga Tuiloma Neroni Slade, sa avea ma se tasi o faamasino o lea faamasinoga faavaomalo.
O ia le uluai tagata Pasefika na filifilia e avea ma faamasino i lea faamasinoga sa suesueina ai moliaga o sauaga matautia ma matuia na faia e nisi o taitai o Malo i o latou lava tagata.
O le taimi nei ua seei le susuga Tuiloma Neroni Slade i le tofiga Failautusi Aoao o le ofisa autū o Malo o le Pasefika le Pacific Forum Secretariat o loo i Suva i Fiti.
O le vaiaso nei e toe taliu ai i fanua le afioga i le Palemia pe a mae‘a fonotaga a Malo Aufaatasi o loo avea ai Samoa ma se tasi o sui auai o Malo Aufaatasi le United Nations Organisation poo le UNO.
