E na o le lulu o le ulu o le Peresetene o le Toomaga mo e Puapuagatia, lulu le ulu o le sui sooupu o le Matagaluega o Leoleo ma Falepuipui a o le taufai musumusu solo o tusitala ina ua agai atu tamaiti e toatolu i le va o le 10 i le ono poo le lima foi tausaga le matutua i luma o tusitala e faaali ‘ai‘aina o le sauaga a le tamā o le aiga na fai i ai i le po o le Aso Toonai ua uma atu sana inuga pia.
O le toatolu lea o le fanau e toaono a se ulugalii Ululoloa. O le tina o le aiga ua lē oo ane i le fono ma tusitala leaga o le la e tau su‘i foi le ulu latou ma foliga ua taumafai le falemai tele i Motootua e togafitia ona faato‘ā tea lea i tua. Na toe maua ane isi tamaiti e toalua ma ua i lalo uma nei o le vaavaaiga a le Toomaga mo e Puapuagatia, ae o loo tau saili pea le tamā o le aiga ua alu ma ave le tamaititi e toatasi.
Na manino le fefefe o tamaiti ma na logo i ai e aua le fefefe se‘i faalauiloa lava manu‘a o o latou ulu se‘i manino ai le atunuu i le faaauau ona tulai mai o nei ituaiga sauaga faasaga i fanau ma tamaitai poo tina foi o aiga.
O le tamaititi (o lona ata ua pueina) e 10 tausaga le matua ma o lana molimau ua fai soo lava le amio lea a lona tamā o le agai atu i le fale e faasuaava ona fasi lea o lona tina ma tafasi faatasi ai lava ma i latou.
E molimau foi isi ma‘ila o le ulu i le fasi soo lea e ta‘ua. O le faamatalaga foi lea a le tina ina ua agai i ai le tatou ofisa e toe tapa sana faamatalaga. “Ua 13 tausaga talu ona ma nonofo, o le amio lava lea o le onā alu atu ma fasi a‘u ma le fanau,” o lana faamatalaga lea.
E ui o lea faato‘ā lipotia lava lea o lenei faafitauli i totonu o lea aiga ona ua tau mai se tagata na malaga mai i se taavale i le po o le Aso Toonai i le tama lea e 10 tausaga o tamoe atu i luga o le alatele ua ta‘e uma le ulu ma o iina na logo ai leoleo ma faafesootai ai loa le Toomaga mo e Puapuagatia. O le faamatalaga a le faalapotopotoga lenei, e lē mafai ona fai ni moliaga se‘i maua mai le tamā o le aiga poo fea ua sola i ai. O lea lava foi ua fai ma asiasi le Matagaluega o Leoleo i le fale o lea aiga ina ia saili poo ua toe foi atu le tamā ae na ta‘ua e Leaupepe Fatu Pula, le Komesina Lagolago o le Matagaluega o Leoleo, o ia foi o le Sui Sooupu o le matagaluega, o lea lava e tulimatai le taimi e alu atu ai le alii lea i lo latou fale ma tau saili ai poo fea le isi tamaitiiti.
O se faamatalaga a le Toomaga mo e Puapuagatia, e tatau lava i tina ma fanau ona maua le lototele e lipoti atu ai i Leoleo ma faalapotopotoga e pei o le Toomaga, sauaga faapea o loo tutupu pea ma faaopoopo i totonu o le atunuu. Ua fiu polokalame faalauiloa ua savali i le 20 tausaga o faatino i le atunuu i mafutaga a tina, saofaiga a matai, autalavou ma aulotu, aoga ma ofisa, e leai lava se agai i lalo o sauaga tutupu mai i totonu o aiga.
Ua iai foi se vaega faapitoa ua faamautu e le Matagaluega o Leoleo ma Falepuipui ina ia tali atu ai i le faatuputupulaia pea o nei faafitauli, ae o lea lava e faaopoopo le numera o i latou ua aafia i nei sauaga mai i tagata lava e tatau ona puipui ma tausi i taitoalua ma fanau.
Faaalia e le tamaitai Leoleo (Inspector) o le vaega lea o tali i sauaga i totonu o aiga, o Sina Tafua, o le mafuaaga muamua lava o le tulai mai pea o nei vevesi i totonu o aiga, o le ava malosi poo le pia. Lona lua atu ai ma le lē lava o le faasoa ma isi mafuaaga o le faitaaga o le tamā poo le tina o le aiga.
O nei mea uma ua aofai i totonu o le tele o vevesi ua tulai mai. “Ma le manatu lava lea o le toatele e tāua atu le faauluuluga a le tamā o le aiga ae ua leai se tāua o le sao o le tina i totonu o le mafutaga lenei ma ua lē tāua tina ma fanau,” o sana faaopoopo lea. “Auā ana faatāua tina ma fanau, e le tulai soo mai le fasi fua ma le soona fai o lea vaega o aiga e tamā ua ave i ai le faauluuluga”.
O le mau a le Toomaga mo e Puapuagatia, e leai la va se isi auala e a‘oa‘o ai tamā ua faia pea lenei uiga lē alofa, se‘i vaganā lava ua oo i le faamasinoga ma ia aveese mai i le mafutaga ua ia lepeti ona o le malosi o le ava malosi ma le le alofa i aiga.
