O se tasi o faaili mai Niu Sila sa asiasi mai i le faaiuga o Setema i Brisbane na mafai ona faamalieina ai le saasaa ma le maimoa faapea le faafofoga a se vaega o le atunuu, o i latou e fiafia e eva i le musika.
Na logo mālie ma fesuiai foi taga ma nota a le faaili a le Salafai Band a o sioa le au tafafao i le po o le Aso Faraile ma le Aso Toonai 28 ma le 29 o Setema. O le Taitai faaili-Tupu Fiu Iakopo (Salelologa) ma nisi nei o i latou i totonu o le faaili: Tinei Fiu Iakopo, Iakopo Fiu Iakopo, Viliamu Fiu Iakopo, Steve Iakopo, faatasi ma le fesoasoani a le susuga ia Sifou Iakopo.
O le susuga ia Tupu Fiu Iakopo o se alo foi o le atunuu sa mafai foi ona talenia i tulaga tau fai faaili i Samoa i aso anamua ma e iai foi le latou sootaga faaleaiga ma se tasi foi o faaili logologoa i le aai o Niu Sa Uelese le Local Savaii Band.
Na o le tasi le vaiaso na malaga mai ai le au faaili se‘i asia pe faapei se tulaga o iai tala aave o Brisbane i tulaga tau faafiafiaga ma se‘i malolo mai foi galuega masani aemaise le fia feiloai i aiga ua leva na valavala.
O le susuga ia Fiu Fale‘ulū Iakopo sa fai ma fofoga o le po. O le susuga ia Faleata ma le faletua ia Sa Fiu Lologa sa faamautu ma api ai le faigamalaga mo le tasi le vaiaso.
O le Aso Sa na toe taliu ai le faigamalaga i aiga ma nuu o aumau ai i Niu Sila ma ua faamoemoe e toe asiasi mai i le Kirisimasi ona o le matagofie tele o le aai nei i le silasila a le aumalaga.
