O le tautua matavela a le Polynesian Umu Cooker i Mt Pritchard Sini Ausetalia ua aave atu ona tala i Amerika ma o le mafuaaga lea na asia ai e le susuga i le fatupese iloga ia Faaetetete Manu ina ua taunuu mai i Sini nei.
O le susuga Faaetetete Manu ua loa ona pese i Samoa ma ua aumau nei i Kalefonia i Amerika. Ua fitu tausaga talu ona malolo mai fatuga ae peitai o le oo mai i Sini a Manu o le sailia o sana sponsor ma se pisinisi e tapenaina lana Koneseti ma Tolumaanave Misiluki Su‘a e faia i Sini nei i le faaiuga o Novema agai atu ia Tesema.
Na saunoa le alii pese, “Na faailoa mai e Vini Faletoese o loo matou aumau i Amerika le lava tapena o taumafataga a le Polynesian umu Cooker ma faasalalauga i le leitio e la outou auaunaga e peiseai o le auala lea o le saili mai o le tofa ma le faautaga.”
Sa talia ma le fiafia e le Pulega a le Polynesian Umu Cooker lenei faatalauula mai a le alii pese ma ua tālia nei le faamautinoaina o lea avanoa e toe maimoa i ai Samoa i lenei siufofoga mālie.
O le sefulufa o tausaga na amata pese ai Manu a o aoga i le tulagalua a Falefitu ma see atu ai le aoga faaitumalo a Vaimauga. O le 1984 na auai atu ai i le Faaili na faaigoaina o ‘Vaitaputapu’.
O lea foi vaitaimi o loo manatua ai pea sa la talanoaga ma le susuga ia Pat Mamaia. “E le galo lea faatalatalanoaga ma Peti aemaise taimi o faafiafiaga o le Tutoatasi, faasalalauga o taaloga aemaise lava taimi o Polokalame a Tamaiti.”
O le susuga a Faaeteete Manu o afioaga e tupuga mai ai o Laulii, Samusu, Lalomanu ma Vaiee ma si ona toalua o Lagi mai Vatia i Amerika Samoa ma Pata i Falelatai.
O le lona 29 lenei o ana CD lea e iai le pese autū o Aso o le Mativa. “O lea pese e manatua ai pea le amataga mai o le soifuaga seia oo mai i le vaitaimi na faatau ai lo matou fanua i Vaipuna.”
“O le CD numera 30 Fausia Faatasi nei Lagona e faatatau i le matagofie o se manatu e autasi uma i ai.” O le auai faatasi o Manu ma Tolumaanave Misiluki Su‘a o le taimi muamua lea o le a pepese faatasi ai i atunuu mamao ma o le a fafagu mai ai le vaitau sa fetalia‘i ai la pese a o faafofoga ma fiafia i ai le atunuu.
