E faatupu manatu le faafautuaga e fai ma tapasa o tulafono
Na maua se faaauro e faailo ai e fogatia ma faalauiloa i le aufaafofoga nisi o suiga ma tulafono e pei ona auai ai le susuga i le alii Satini Sinia ia Senior Sergeant Keith Gilbert ma le liaison officer ia Aleni Taalolo, e i le ofisa o leoleo o Inala i le itumalo o Oxley.
Sa o la toe faamanatu ai i le aufaafofoga nisi o suiga e uiga i laisene o isi atunuu (Foreign licence & Road Safety) faapea le saogalemu i luga o auala a o alala ma papaaao i Kuiniselani.
E moni lava le upu a le atunuu, “E tu manu ae le tu logologo” o le tau logologo lava e faatupu manatu i le toatele.
O nei avanoa o loo faapea ona maua e le Siufofoga o le Penina o Asuisui i luga o le Switch 1197am e faamatuu mai ai pea ni suiga ma ni lapataiga e nofouta pea i ai le paia o Samoa o alala i Brisbane e uiga i galuega a le Matagaluega o leoleo.
Na ta‘ua e i laua le tele o nisi o loo maua pea o feoai i laisene NZ ma Samoa ae lapataia pea le atunuu ina ia nofouta i ai, e na o le tolu lava masina e faataga ai ona tatau lea ona suia auā e sala pe a maua.
Sa toe faamalosia pea le tele o faalavelave tulai mai ia i latou o aveina pea taavale ma feoai faasuaava e aunoa ma se magafagafa i ia vaega ae lelei ona tuu ese ki o taavale a o lei oo atu i se lalolagi pogisa.
E momoli pea le agaga faafetai i le susuga ia Aleni Taalolo o se alo o le atunuu o loo mafai ona galulue faatasi ma le leitio aemaise o nai alii Satini.
E le gata i lea o isi matagaluega a le malo o loo fai sao e pei o le Matagaluega o Soifua Maloloina, le faletua ia Tu‘i Peterson faatasi ma le faletua ia Ave Togia Foua i nisi o faagaioiga e logologo pea i le atunuu lautele i Brisbane.
O le Centre Link poo le manuia lautele o loo sau ai tupe maua mai le malo, o loo faaailoa pea ma logologopuialii e le faletua ia Eseta Frost e pei ona faamatuu mai foi lona taimi.
E ui lava ina filofilo i faapotopotoga le lotolotoi o Samoa peitai o loo taumafai pea e auina mai nai faletua ma tausi, tamalii ma failauga faapea alo ma tamafanau o Samoa e faailoa mai o latou faiva e fesoasoani mai i le atunuu lautele o alala i lenei aai, a o faafaigofie nei vaega uma.
O loo mamalu pea ma saogalemu le faamalumaluga a auauna paia a le Atua i totonu o Ekalesia taitasi, Mafutaga ma Faalapotopotoga faapea foi alaleo i le galuega faasalalau.
Ua iai le faamoemoe o le a toe maua se isi avanoa o le matagaluega o leoleo i le faaiuga o le masina o Oketopa poo le amataga o Novema pe a tusa ai ma le finagalo o le Matai, ma e ta‘i masina foi ma fai sao nisi o matagaluega i le faalauiloa atili o a latou foi galuega masani mo le silafia e le atunuu.
