O le faaiuga o le vaiaso nei, Aso Faraile 19 o Oketopa 2012, o le a tatala ai mo le taimi muamua se ofisa Konesula o le Malo o Samoa i le aai o Sini i Ausetalia.
O se faaiuga ua faia e le Kapeneta ona ua faaalia e le afioga i le Minisita o Tina ma Tamaitai, Atinae o Nuu ma Aga Fesootai, le tofa Tolofuaivalelei Falemoe Leiataua, ua silasila le Malo ua telē le sao o le Malo o Ausetalia ia Samoa i fesoasoani eseese ae lē faaitiitia le sao o tagata Samoa o aumau ma alala i lea aai ma isi vaega o lea atunuu i le tamaoaiga o Samoa tutoatasi. O le faaiuga a le kapeneta ua filifilia ai ma le uluai tamalii o le atunuu e avea ma Konesula muamua mo lea ofisa o le Malo o le tofa Manogiamanu Fonoti Etuale Ioane.
“O le tamalii lena ua faia i ai le faaiuga a le Kapeneta, ma o se tasi foi o tamafanau ua leva tausaga o galue mo le malo i lo tomai tusiata, ae sa ia pulea foi le ofisa o taaloga a le Pasefika lea ua avea nei ma itutino e pulea taaloga ma malae taalo i le atunuu”, o le finagalo lea o le minisita i se faatalanoaga.
O le afioga i le Palemia, Susuga Tuilaepa Lupesoliai Sailele Malielegaoi, o le a tatalaina le ofisa lea o le a auai ma nisi o minisita e toatolu o lana kapeneta.
O le amataga o le vaiaso nei e afea ai Niu Sila e le Palemia mo nisi o fonotaga tāua faalemalo, ona faaauau atu ai lea o lana faigamalaga i Ausetalia mo le tatalaina o lea ofisa o le malo Samoa.
Ofisa o le Konesula ma le aso fanau o le HRPP
O le isi sauniga tele o le a faatino ai i Sini Ausetalia pe a mae‘a le tatalaga o le ofisa o le Konesula o Samoa, o le faailogaina o le aso fanau o le vaega faaupufai o le HRPP ua atoa le 33 tausaga talu ona faavaeina.
“Ua manatu le taitai o le malo ma lenei vaega faaupufai e faatāua le sao o lo tatou tagata o loo lagolagoina lenei pati faaupufai ae o alala i fafo, aemaise o le latou foi sao tāua”, saunoa ai le minisita le tofa Tolofuaivalelei Falemoe Leiataua.
Na saunoa foi le minisita ua mae‘a ona faamanatu i Niu Sila i le tausaga e 2008 le aso fanau o le vaega faaupufai ae o lea faato‘ā faamanatu i Ausetalia ma o se tulaga tāua lava lea i le silasila a le taitai ma sui faipule o le faafaletui o le vaega e puipuia aiā tatau o tagata.
A mae‘a le aso fanau o le HRPP i Sini ona masii lea o le faigamalaga e faatino foi se latou polokalame i le faamanatuina lava o le aso fanau o le vaega faaupufai i Brisbane i Ausetalia lava i le Aso Toonai 20 o Oketopa 2012. A mae‘a ona toe taliu lea i le atunuu mo le sauni ai i le fonotaga a le Palemene i le vaiaso e sosoo ai.
Ofisa Konesula, aso fanau HRPP, sami 50 tausaga tutoatasi ma le ofisa o le Toomaga
Ua molimauina le lagolago pea e le malo o galuega lelei o loo faia e le faalapotopotoga o le Toomaga mo e Puapuagatia, le Samoa Victim Support Group. O le isi faamoemoe tāua lea o le malaga o le Palemia ma nisi o minisita o le kapeneta i Ausetalia ona o le a tatala ai ma le lala poo se isi ofisa o le faalapotopotoga o le Toomaga mo e Puapuagatia.
Faaalia e le minisita ia Tolofuaivalelei Falemoe, o le Palemia o le a ia tatala lea lala fou o le Toomaga mo tagata Samoa o alala ai i le aai o Sini.
Faaalia foi e le minisita o le tasi lea o faalapotopotoga ua saoasaoa tele ana galuega fesoasoani mo mafatiaga o fanau ma tina ma isi tagata o le atunuu ua aafia i sauaga o le tino ma le mafaufau, ma o le mafuaaga foi lea o le naunau o le Palemia e fia auai i le tatalaina o le ofisa i Ausetalia.
