Mafatia ua faauma e le teine le faigauo, mafua ai ona fasioti le avetaxi

E leai se isi e lē misi alofa isi alii o Ete Faiumu Numia Ete 28 tausaga le matua mai Pesega ma Taga i Savaii, ona o le faalavelave na maliu faafuasei ai i le po o le Aso Lua 9 Oketopa 2012 ona o se gaioiga na faia e se isi alii sa ia umia se laau malosi puupuu, poo se pistol o le ituaiga o le 22.

Ua faamatala e le Komesina lagolago le afioga Leaupepe Lealaitagomoa Fatu Pula, o le alii o Ete sa faigaluega i le po lea e laupasese i lana taxi ma e tautua i le fale taavale laitiiti laupasese o le 57 Seven i Motootua.

Poo le sefulu agai i le sefulutasi i le po lea na ia pikia ai se alii talavou mai Malifa. E faapea mai le faamatalaga a le Komesina lagolago, sa toalua Ete ma le isi ona uso i le faia o lana galuega. Faaalia e Leaupepe sa taofiofi taavale le taulealea mai Malifa i le po o le Aso Lua ae sa lē tu i ai se taavale.

O le taxi a Ete na muamua lava tu ai ma piki ma le faamatalaga a le alii e fia alu i le nofoaga o le Cash Power i Vaitele.

Sa alu le malaga ma talatalanoa e pei ona faamatala se molimau faatuatuaina, ona faapea lea o se talasua a le ave taxi i le alii mai Malifa lea na ia pikiina, masalo pe 30 i le 40 tala lona pasese. E fai ana tala ma ‘ata ma alu lava le faigamalaga e aunoa ma le iloa se faalavelave matuia o le a tupu.

E faapea mai le molimau o talasua ia a le alii ave taxi na pei e faalii ai le taulealea mai Malifa, lea na mafua ai ona tupu le faalavelave ina ua taunuu i Vaitele.

Sa ia faatonu loa Ete e alu i fafo ma le taavale ae o loo saofai lona uso i totonu. Sa ia fai foi i le ave taavale e savali agai i luma ae ia avane loa le laau malosi sa ia umia ma faasiilima ai. E fai lana gaioiga lea e leai se isi o iloa ane le mea ua tupu, e pei ona faamatala le molimau o se tasi o le aiga o Ete sa ia maua le faamatalaga mai le uso o Ete sa la malaga ina ua uma ona tupu le faalavelave.

E fai le gaioiga a le alii mai Malifa ma ia tilotilo agai i le taxi poo migoi le uso o Ete e fai sana gaioiga. A vaai atu o migoi ona ia ta‘i lea i ai o le fana. O le taimi lea na ia toe tilotilo atu ai ia Ete o loo tu ma faatali pea i ana faatonuga o loo faia, na faalogoina ai loa e le uso o le ave taxi le pa o le fana ma palasi ifo lona uso i lalo. E faapea mai leoleo o le pito i tua o le ao (ulu) o le ave taavale na lavea i le pulufana.

Na valaau le uso mo se fesoasoani ae sa na o le taufetuli ane o nisi o le ofisa o le EPC e faatau ai le cashpower ma sisila ane ma le meia e lē talitonu i le mea ua tupu. E oo i le sikulati ma le leoleopo e lei mafai ona gaioi ona e faateia i le faalavelave. Na tago ane le uso o Ete i lana telefoni ma togi ai foliga o le alii mai Malifa, ma o le gaioiga la lea na palasi ese ai le fana ma tamoe faavave ese ai loa le alii.

Sa fai tuliga ma le uso o Ete peitai na toe foi ane le uso i le nofoaga o le faalavelave mo le faia o se fesoasoani ina ua lē maua le taulealea mai Malifa. E oo foi i le taimi lea na foi ane na faamatala le molimau sa augani atu le uso i tagata sa iai mo se fesoasoani se‘i sii si ona uso i le taavale ae sa na o le tutū ma sioa ane ua matuā meia lava ma faateia.

Na taunuu leoleo ma fesoasoani ane ai loa e sii le alii ave taavale ma nanati loa i le falemai mo se fesoasoani, peitai e lei manuia ia gaioiga ona ua maliu lava o ia.

 

Sailia a leoleo e fia maua le alii na faia le faalavelave

O le Aso Lulu i le ao atoa na faia ai sailiga a leoleo e fia pueina le taulealea na faia le faalavelave. Na faaalia e Leaupepe Lealaitagomoa Fatu Pula, e toatele le atunuu na tuuina atu faamatalaga sa fesoasoani i le tau sailiga o lē na faia le faalavelave. Na toe siaki ai e leoleo se aiga i Malifa lea e faamautu ai le taulealea ma maua ai o loo lafi i lo latou fale.

Na aumai loa i le ofisa autū o leoleo i Apia ma suesueina ai. O lana faamatalaga na fai i leoleo e pei ona faailoa e le komesina lagolago, o lana uo teine i Amerika Samoa sa vili ane i le aso lea ma faauma atu le la faigauo.

O lona mafatiaga lea sa mafua ai ona ia umia loa se laau malosi ma mafaufau i se gaioiga e faatino.

Faaalia e leoleo o le taulealea e foliga sa taumafai e pule i lona ola, pe a fua atu i lona taofiofi taavale ona sa ia fafau e ave faamalosi se taavale ma faatino ai se gaioiga e pule i lona ola.

O le agalelei o Ete ma lona uso lea na la pikiina ai le alii ua faaalia e leoleo ua tupu ai se faalavelave matuia ua ufitia ai mātua ma aiga o le alii ave taavale i le faanoanoa ma motusia faafuasei ai le mafutaga.

E lei iloa se aso e tulai ai le alii ua molia nei i le fasioti tagata faamoemoeina. O lona suafa o David Crichton o Malifa ua 21 tausaga lona matua.