O se misa na tulai mai i se tasi o fale kalapu i totonu o Matautu i Apia na vaaia ai ni ifoga se lua na faatautaia i le vaiaso na tea nei.
O le misa na mafua mai i le va o se tamaitai mai i le afioaga o Laulii na vevesi i totonu o le fale faafiafia ma iu ai ina pisa ma leoleo o le Club-X.
Na agai lea tamaitai ma avane ni taulelea o le afioaga sa tafafao ai i lea fale ma faaopoopo ai loa le vevesi ma iu ai foi ina feosofi nisi o tupulaga a Matautu – ina ua vaaia ia vevesi.
O le mataupu ua oo i le Ofisa o Leoleo, e pei ona ave ai se tagi a le Pulega o le falekalapu, peitai na mautala loa le afioaga o Matautu i le tulai mai o lea faafitauli agai loa i Laulii i le aiga o le tamaitai na iai i lea vevesi ma faatino ai se ifoga.
O le puipuiga a le afioaga ina ne‘i toe tulai mai nisi vevesi i le taulaga ma na oo atu lava le pule o le fale kalapu i le afioaga o Matautu ona o le popolega i faatetele misa nei ma faaleaga ai lana pisinisi.
O le ifoga na faatino e le afioaga o Matautu na avea ma auala na silafia ai loa e le afioaga o Laulii le mataupu lenei, ma o le aso lava na sosoo ai na faateia le pulega o le fale kalapu i le oo atu o sui o alii ma faipule o Laulii atoa ai nisi o le tupulaga sa aafia i le misa i le faaiuga o le vaiaso ma faatino foi se ifoga ma se faaleleiga i le fale faafiafia lea.
O le faafetai a le afioaga o Matautu ona o lea ua faatino e le pulega a le afioaga o Laulii lenei gaioiga ua mautinoa ai o le a leai se isi vevesi e ono tulai mai. O lea foi la ua iai se isi laasaga fou i puipuiga a le afioaga aemaise o nofoaga nei o loo i lea itu o le taulaga o Apia i Matautu.
O le vaiaso lenei ua faamamalu ai vavao poo sā a Matautu e amata mai lava i luga o taligalu o loo i totonu o le afioaga lenei o Matautu i le pitonuu i tai ma le pitonuu i uta atoa ai le auala tele. Ua amata atu i le vaiaso lenei ona matuā tapu nisi e maua o feoai solo i luga o taligalu i Matautu i le taimi o faigalotu i le afiafi.
E le gata i lea o le a faamamalu vavao poo sā a le afioaga, i le 10 i le po seia oo lava i le taeao.
“E aofia ai foi le lautele o le atunuu, ma o le a logo lava ia i latou tapu a le afioaga ia o le a faamamalu,” o se saunoaga lea a le afioga i le tofi o Matautu, o le sui foi lea o le Malo, Pupualii Segio lea na taitaia le feiloaiga na faatautaia ma le afioaga o Laulii ma ua taulamua nei i sā ua faamamalu a le afioaga.
“O le tulaga tāua lava, ua iai le galuega ua faatino ina ia taofi ai le ono tulai mai se isi misa e lē mafai ona taofiofi”. Faaalia e Pupualii Segio, e lē na o le pau foi lea o le faafitauli o loo tulai mai i nofoaga nei o loo afea e le toatele mo tafaoga i afiafi.
E tele lava foi fale faafiafia ma faleaiga o loo i totonu o le nofoaga lea o Matautu, ma o le tausaga na tea nei lea na tulai mai ai ni vevesi na iu ina tau‘ai ai faletalimalo ma nisi o fale nei, ma ofisa i lea itu o le taulaga.
O loo faagasolo lava faamasinoga i nei vevesi ma e lē o toe oo i ai le afioaga o Matautu auā o le toatele o ana tupulaga ia na ave e leoleo ma ua faagasolo nei a latou faamasinoga ona misa ia na tulai mai.
