I le taeao o le Aso Toonai na se‘i mavae atu nei na faatumulia ai le nofoaga autū i le taaloga netipolo i Henderson Te Pai Courts le nofoaga sa faagasolo ai lenei taamilosaga, vaaia le felanulanuai o togiga mai lava i ‘au laiti e oo atu lava i ‘au a tagata matutua, e fai o le loulouā o le tau i le mamafa o timuga ae sa lē solomuli ai le toatele i le maimoaina o nei taaloga.
Sa vaaia le saunia lelei o tapenaga a Samoa i togiga ma vaega uma, le lagolago a mātua sa lē solomuli lava e ui i le mamafa o timuga i lea taeao. E pei e foliga mai i lea taeao ona o le loulouā o le tau faatasi ai ma le mamafa o timuga masalo poo le vaega tonu lea na lē faamanuiaina ai finau a nisi foi o ‘au sa auai i lenei taamilosaga, sa atoatoa uma lava ‘au a Samoa se‘i vaganā ai le tulaga e pei ona faailoa mai e le Peresitene Netipolo a Samoa i Aukilani ia Maria Kamuta-Pati e faapea na faafuaseia ona ia taofia le toe faaauau ona finau o ‘au a Samoa e mafua mai i se faaletonu mai totonu o le pulega o le taamilosaga ua ia manatu ai, ua talafeagai ona taofia Samoa i le toe faaauauina o le taamilosaga ona o ia faaletonu na aliai mai i lea aso faatasi ai ma le tulaga ua tatau ona tuumuli le fanau mo sauniuniga ma tapena o le Lotu a Tamaiti.
E ui lava i ia fatia ae sa faaalia lava le agaga faafetai o le peresitene ia Maria Kamuta-Pati ona o le tulaga maualuga o tomai a le fanau i le taaloga o le Netipolo o loo iai foi le talitonuga e ono filifilia foi nisi i le lumanai i ‘au tetele e le gata i Niu Sila ae faapea foi Samoa.
