O tausaga uma lava e agai mai ai i Upolu le aulotu a le matagaluega Metotisi o le afioaga o Satufia Satupaitea mo koneferenisi a le Ekalesia Metotisi e saili lava se nuu e faamautu ai ma e tele lava ina malaga mai na o le faafeagaiga ma le faletua ma ni sui toaitiiti pe toalua o le matagaluega ona o le faafitauli lea.
Ae o le tausaga lenei o le a agai mai le toatele o sui usufono o le Koneferenisi auā o lea ua mae‘a ona fausia le nofoaga mautu o le matagaluega i le laumua o le Ekalesia i Faleula.
O se fiafia tele na molimauina i le vaiaso na tea nei ina ua faaulufale le galuega a lea aulotu i le mae‘a ai o lenei galuega.
O le faafetai a le susuga i le faafeagaiga ia Rev. Sua Moananu Masoe ona o le lotonuu ma le lototasi o aiga o lenei aulotu ua mafai ai ona tino mai lenei galuega.
E fā masina na fausia ai lenei maota ma ona totoga uma ma o sui lava o le matagaluega i Satufia Satupaitea na galulue i le fausia o le latou fale tele. O le sailiga tupe ina ia maua ai le seleni o le galuega na faia i Niu Sila ma Ausetalia ma o fanau lava a le matagaluega na galulue i le aoina o lea tupe e tusa ma le $54,000 (tala Samoa) ma aumai e amata ai le galuega, ae i Samoa nei lava ia o le sailiga tupe tele a le matagaluega na faatau ai se CD o pesepesega poo viiga o le Atua auā le tupe mo lea faamoemoe. E lē gata i lea o sailigatupe lava a le aulotu latou na faia i totonu o le afioaga mo lea galuega.
O le tau atoa o le galuega e $82,000 tala ma o le faafetai tele, o le a lē toe tau saili se nofoaga o le matagaluega mo faatasiga e pei la o le koneferenisi.
O le maota lea o le a faamautu ai foi sui o le matagaluega e malaga mai i Savaii i taimi uma o le tausaga mo fonotaga a le Ekalesia faapea le faamautu ai o sui o le matagaluega o loo galulue i le Ekalesia i lona ofisa i Faleula e pei foi ona vaaia i isi maota o galuega a isi matagaluega o loo ua fausia ma faatutu i lea laumua o le Ekalesia.
