O le tamaitai 18 tausaga o Jadyn Patrilita Petimara Ualesi, o se alo e faasino i le afioga ia Tauiliili Eti Junior Ualesi ma le faletua ia Silia Kelepoa Ualesi, na ia tusia ma tuufaatasia se tusi ua faaigoaina o le “Fear to Love”. O le tusi muamua lea ua ia mafai ona ia tusitusia ma tuufaatasia i le 3 masina i le tausaga ua mavae 2015.
O le sini ma le faamoemoe maualuga o mafaufauga a lenei tamaitai na ia tusi ai lenei tusi, ona e pau lea o le auala e mafai ai ona ia faailoa ona lagona aemaise ai o se avanoa lelei lea e mafai ai ona faitau ai isi tagata.
Faaalia e Jadyn o soo se taimi lava e nofonofo ai o le taimi foi lea e tutupu ai ona mafaufauga ma ia tusitusia loa i lalo. O se mea e mamafa tele i lona mafaufau a o iai i le mafaufauina o upu o le tusi, ae ina ua mae‘a lana galuega ma faalauiloa, na pei ai e pa‘ū ese atu se avega mamafa sa ia te ia.
Ua ia faaigoaina le Tusi o le “Fear to Love” auā e iai taimi e manao ai e faaauau le alofa, ae iai foi taimi e musu ai, ina ne‘i iai se faafitauli e tupu, e pei o le mafaufau i le pule i le ola, o le alu ese ma le aiga, pe a manatu ua na o ia le aiga. O nisi la vaega o le tusi o loo ia faasoa ai i ni ona lagona, ae o le tele lava o itulau o loo ia tusia ai se Love Story e faasoa i isi tagata.
Ua mae‘a tapena foi le tusi lona lua ua faaigoaina o le “Fear to Lose” lea o loo faamoemoe ia Iuni poo Iulai e tatala ai, faatasi ai ma le tusi lona tolu lea ua tapena i ai. O le tusi muamua o le “Fear to Love” e 3 masina na ia tuufaatasia ai, a o le tusi lona lua o le “Fear to Lose” e 5 masina na tusia ai.
Ae na faailoa se lagona o lona tuaa ia Silia Kelepoa Ualesi, e leai se mafaufau o laua mātua e tusia e Jadyn se tusi, auā e lē o se teineitiiti atamai, ae filemu, e lē tautala, ae e pei o ana tusitusiga o loo ia tusia ai ona mafaufauga, ae seāseā tago faasoa pe talanoa, ae pei o ana tusitusiga e talanoa i ai.
O le galuega a mātua ma le soosootau‘au o le lagolago ma faatupe lenei taumafaiga ina ia ausia le moemitiga ma le mea o loo naunau i ai le loto o lo laua alo.
O se avanoa lelei ma le faamalosi foi a lea tina mo mātua uma ia taumafai e faamalolosi ma lagolago le moemitiga a fanau ina ia tau lau o o latou faamoemoe. Aua ne‘i faia le mea o loo mananao ai mātua ae fai le mea o loo fiafia ai fanau e faaauau ma ausia.
E ui i le taugata o le faatinoina o lenei faamoemoe ae sa taumafai lava mātua e tuu mai lo laua loto ina ia manuia le faamoemoe.
O Jadyn na fanau i Samoa ma amata ai lana aoga i le aoga amata a le Manumalo i Leonē, ona faasolo atu lea i le aoga tulagalua a le Peace Chapel i le tausaga 2004 i le 2009.
2010 – 2013 na aoga ai i le Kolisi o le Faatuatua i Vaitele ma faasolo atu ai i le NUS i le tausaga 2014.
2015 ia Fepuari na malaga mai loa i Niu Sila nei i Ueligitone ma aoga ai i le Weltec seia oo mai i le 2016 ma faaauau lana aoga i le Weltec i Hamilton i le Business Administration and Computing Level 4.
O le 13 o tausaga o lenei tamaitai ae fiafia loa e tusitusi, ae o le 15 o ona tausaga na ia tusia ai le tusi sa faaigoina o le Broken Heart ae lei mafai ona faatauina, a o le 18 nei o ona tausaga na ia tusia ai loa le tusi lenei o le “Fear to Love” ma ua mafai ai loa ona faalauiloa ma faatauina i tua mo le atunuu.
O le afiafi la o le Aso Toonai na tumutumu ai aiga, uo ma ē masani i le malumalu o le Word of Life i Otahuhu, e molimauina le tatalaina o le taumafaiga a lea alo talavou o le atunuu. O susuga i faafeagaiga ma o latou faletua aemaise o le susuga i le aoao mai Piula ia Rev Latu Tioa sa fofogaina le upu faauuina a le Atua. Sa faapea foi ona faatauina ai ma le tusi i lea po i le $30 ma le mitiafu o loo tusia ai le igoa o le tusi i le $25 ma faaiu ai loa i le iputi o le afiafi.
