Ua toe lua vaiaso ona faia lea o le palota tele a Samoa e toe filifilia ai ni faipule o le Palemene. Ua tapuni le faauluga o sui tauva ma ua faamaonia ai le finagalo autasi o le itumalo o Satupaitea na fofogaina i se vaitaimi o le tausaga ua mavae, e leai se palota ma e toe filifilia mai lo latou faipule le afioga Lautafi Fio Selafi Purcell.
O lea ua mausali le finagalo autasi o le itumalo ona e tapuni le lesitala o sui tauva e na o le toatasi lava le sui ua faaulu atu ua na o le afioga Lautafi. O lea tamalii na filifilia i le palota laititi a Satupaitea ina ua faaleaogaina le filifilia o se tasi o tamalii talavou o le itumalo na manumalo ile palota tele o le 2011. Na mafua lea tulaga ina ua faamaonia tuua’iga o faatosina solitulafono ise tagi o le faigapalota o lea tausaga.
O le lua tausaga ua mavae na tofia ai e le Palemia e avea ma Minisita o lana Kapeneta ina ua faamavae le faipule o Palauli le Falefa le afioga Faumuina Tiatia Liuga Faaolatane sa tauaveina le tofi minisita o Tupe.
Na filifilia Lautafi e avea ma Minisita o le Matagaluega fou ua vaaia nei faalapotopotoga tumaoti uma a le Malo, ae toe tauave e le Palemia le tulaga minisita o Tupe. O se tasi lea o minisita e puupuu lona taimi i totonu o le saofaiga a le Kapeneta ae ua molimauina le tausaafia i le faatinoga o ona tiute aemaise o lana matagaluega fou ae o loo ia vaaia foi le Faalapotopotoga o Eleele o le Malo o se tasi o faalapotopotoga sa tele i ai faitioga ma aliali mai ai ni faaletonu i le lipoti a le Pule ma le Suetusi Sili a le Malo.
O lona tulai mai foi i le vaaia o lea faalapotopotoga na fetaia‘i ai ma le faalavelave na mu ai le maketi i Savalalo e pulea e lea faalapotopotoga, ma sa vave ona tali atu le minisita i fesoasoani mo pisinisi laiti na faatamaia uma a latou meatotino i le mu.
O le afioga Lautafi o se tasi o minisita e molimauina foi e na te lē natia se faamatalaga e fesiligia ai e le autusitala ma le aufaasalalau i mataupu e faasino i matagaluega ma faalapotopotoga a le Malo o loo i lalo o lana vaaiga.
O le mau a nisi o se minisita na te tausisia vaega tāua o pulega lelei o le mautali i soo se taimi e fesiligia ai aemaise o le mau a nisi o minisita o le kapeneta, o se tamalii e galue ma le filiga i le naunau e faataunuu ona tiute.
Ia manuia le toe filifilia o le sui faipule o Satupaitea mo le paeaiga lona 16 a le Palemene.
