O le faili malosi a le Mt Fao (Mauga o Fao) o se tasi o faili ua logologoā ma ta‘uta‘ua i le itu o faafiafiaga aemaise lava o le faafiafiaina o le mamalu ma le paia o si o tatou atunuu e ala i siva, faapea foi faamoemoe o faalapotopotoga, aiga, ma Ekalesia i le aai nei o Melepone.
O se tasi o anavatau o loo talenia ai le Mt Fao, o le tusia lea ma tuufaatasia pese mo a latou CD e pei ona mae‘a ai la latou Numera 4, peitai, o le Aso Toonai na se‘i mavae atu, na faatumulia ai se tasi o nofoaga mo faafiafiaga i le pitonuu o Sunshine, i le paia maualuga o Samoa na afifio atu e molimauina le tatala aloaia o le CD lona lima a le faili.
Na fai faatasi ai lea ma le latou siva e faafiafiaina ai le valaaulia, aemaise o le mamalu o le atunuu e fiafia e faafofoga ia latou fatuga, aemaise ai lava o paaga, uo ma aiga o le Mt Fao.
Na molimau nisi o le valaaulia, ua atili ai le lelei ma le siisii i luga o fatufatuga a le faili, aemaise foi o le finagalo ma lagona o loo momoli mai ai le agaga faa-Samoa saili malo i le musika ma a latou pese.
Na faato‘ā amata faatau atu ai i le mamalu o le atunuu le CD lona lima lenei i le po lea o le Aso Toonai, ae o le Aso Gafua lea o le a amata faatau ai i le faleoloa o le susuga i le alii pule o le faili le susuga ia Junior Pio, le faleoloa ua lausilafia e Samoa i Melepone le Laufaasolo Shop.
E maua uma ai lava foi ma isi CD a le faili, aemaise o le lasilasi o isi CD aemaise foi o ata DVD o soo se faamoemoe o lo tatou atunuu e faia i Samoa.
