Ua fia inivesi le toatele o faipisinisi i Samoa
O le Aso Tofi ma le Aso Faraile talu ai, na faataunuu ai le fonotaga faapitoa a le InvestSamoa Conference, sa faatautaia i le faletalimalo o le Pullman Hotel i le aai o Aukilani. O le autovaa mai o le afioga i le Alii Palemia o Samoa, le Susuga Tuilaepa Lupesoliai Sailele Malielegaoi, ma lana aumalaga toatele o nisi o faipisinisi a Samoa aemaise sui o le malo, i le faamoemoe e faamautuina ma sailia nisi o faipisinisi i Niu Sila nei, poo i latou o loo tele a latou seleni, ina ia fiafia e agai atu i Samoa e faatulaga ai a latou pisinisi, ma saga faateleina ai foi a latou tupe, ae o le a selesele ai Samoa e ala i le gasolo atu o nei kamupani tetele ma amata ni atinae o galuega, o faatoaga ma falegaosi mea, ae tele ai foi ma avanoa faigaluega mo o tatou tagata.
O se fonotaga sa tulagaese auā na vaaia le toatele o tagata faipisinisi Samoa na naunau e maua le avanoa e oo mai ai ma faalauiloa a latou oloa, ae sa vaaia ai foi le lagolago atu o o latou uso faipisinisi Samoa o loo alala ma papaaao i Niu Sila nei, i le fia faalautele atu o o latou foi tomai e soosoo tau‘au ai i fuafuaga a lo latou malo Samoa.
O malo faaaloalogia o lenei fonotaga, o le afioga i le alii Palemia o Samoa, Tuilaepa Sailele Malielegaoi, faapea le alii sui Palemia o Niu Sila, Bill English, faapea foi se tasi o tino iloga i Niu Sila i le itu tau pisinisi ma tulaga faalemalo, le afioga ia Talitiga Don McKennon, aemaise foi le taitaifono o le Trades Commission i Niu Sila a le Pasefika mo Samoa, le afioga i le Tauaana ia Anae Arthur Anae.
O nisi o sui o le aumalaga mai Samoa sa fai ni a latou folasaga i lea fonotaga, e aofia ai le tamaitai Pule sili o le Pulega a Tagata Tafafao Maimoa mai Fafo poo le Ofisa o Turisi, le susuga Papalii Sonja Hunter, le Pule sili o le Matagaluega o Pisinisi ma Leipa, Auelua Samuelu Enari, le sui Loia Sili, Papalii Malietau Malietoa sa saunoaga i le tulaga o eleele o Samoa, le Pule o le faletupe a le ANZ, Mike Poort, le Pule sili o le Matagaluega a le Siosiomaga, Taulealea Laavasa Malua, faapea isi suafa ua lē māua uma i le lipoti.
Foliga mai o le tele o fesili sa momoliina atu i lea faatasiga i le aumalaga mai Samoa, e mātele lava i le fia iloa o se aofaiga o turisi poo tagata o loo tafafao maimoa atu i le atunuu, le tulaga o faletalimalo, o tulafono e tusa ai o eleele o le atunuu, aemaise o aiaiga ma tulafono tau faletupe ma le nonoina o tupe.
E toatele foi i latou sa autovaa mai e fia silafia manaoga ma tulaga uma e ono manuia ai le atunuu i lenei faiga faapaaga a Samoa ma Niu Sila. E foliga mai sa taulau manuia le misiona o lenei fonotaga e pei ona ta‘ua ai le toatele nisi ua amata ona naunau e fia oo atu i Samoa mo le faia o ni a latou pisinisi, ma faafaigaluega ai o tatou tagata, ma maua ai tupe a lo tatou malo, o se auala lelei o le a siitia ai le tamaoaiga o le atunuu.
Matauina foi le toatele o papalagi sa auai, le toatele o sui o le malo, faapea o tatou tagata sa tumutumu ai i ia aso e lua, aemaise o le fia maimoaina o oloa a le aufaipisinisi Samoa sa auina mai e faalauiloa ai.
Tele auaunaga eseese sa faalauiloa e pei o le auaunaga a le Digicel, e lē gata i lea, o fua o faaeleeleaga e pei o fa‘i misiluki, fa‘i samoa, o le suauu e fai mai le avoka, o lotion e fai mai le fua o le fetau, le pusipo, o fagupolo feū, ma isi foi auaunaga e pei o le SIFA ma le tele o isi auaunaga.
Sa faaiuina lenei faamoemoe i le Aso Faraile, ma e iai le talitonuga ua matuā aogā lenei tau lagalaga a le Malo, ma e talosia ia ua tafa mai ni tau lelei o le a ono tulai mai ai le tamaoaiga o Samoa i se taimi e lē o toe mamao.
O lenei fonotaga a le InvestSamoa sa faamaopoopo e le New Zealand Samoa Trade Commission ma faatupeina e le malo Samoa mal e Pacific Cooperation Foundation.
