Nisi o le fanau sa fai le faataitaiga o le polokalame

O le tolu tausaga talu ai na fuafua ma faataoto mai ai e le susuga ia Albert Tupuola ma lona faletua ia Rebecca Tupuola se polokalame mo fanau lalovaoa o Samoa o loo soifua ma ola i totonu o Niu Sila. 

O se tofa mamao na a’e i lea alo o le atunuu ma lona faletua e ala i se polokalame e a’otauina ai fanau i le siva Samoa, ae o faatasi lea ma le gagana Samoa. E galulue faatasi foi le polokalame ma le fai lea o meaaoga a le fanau, o le lagona o le susuga ia Alapati ma lona faletua ina ia tatau ona paleni mea uma, ia aua ne’i faatāuaina na o le siva ae tatau ona faatāuaina foi le fai o meaaoga. Ia iloa ma malamalama le fanau o aoga mea uma. Ua iai aoaoga ua fuafuaina e faapitoa i ai lenei aoga e pei o le mauluulu, sasa, faataupati, siva manaia ma pese Samoa, ae lē gata i lea o loo vaavaai foi i le alualu i luma o le soifuaga i le tulaga lelei e tatau ona iai aoaoga ma le sailia lea o galuega faatasi ai ma le malamalama o le tamaititi aoga i le gagana Samoa. 

O le tāua foi o le polokalame, o le taumafai lea o le susuga ia Albert ma lona faletua ia Rebecca e faamalamalama le uiga o le siva Samoa poo aoaoga i le tiu o aoga i le gagana Samoa ma lana aganuu. O loo iai foi polokalame faaleagaga poo Bible Study o loo faatinoina ma o le tasi lea vaega e pito sili ona tāua o le taumafai lea ia momoli faatasi le feau o le aganuu, gagana ma le faaleagaga i fanau lalovaoa o le atunuu.

O le upu moni e lē siva pea se isi i lenei olaga atoa, o le saunoaga lea a le susuga ia Albert Tupuola, ma o le tasi lea moemitiga ia i laua ma le faletua ina ia mafai ona faasoa atu lana taleni siva o loo iai i alo ma fanau o le atunuu. Ua foai le meaalofa a le Atua i totonu o le laua aiga e ala i se oloa tāua lea ua laua talisapaia, ma o le tumutumuga lea ua faamalosia ai o laua loto e a’oa’o fanau ia iloa le aganuu, ma le gagana Samoa, auā o taleni ma meaalofa o loo iai e lē alu ma se tasi i le lagi pe a oo mai le valaau a le Atua.

O le susuga ia Albert e faigaluega i le correction i le falepuipui o loo ia silafia foi le tele o faafitauli o loo tulai mai i totonu o le komuniti a Samoa ma le Pasifika, o lona ia talitonuga e faapea, a falepuipui le matua o le fesili e ono tulai mai, o fea a tua i ai fanau? Ma e telē se mea o loo i tua o lenei polokalamae o le a mafai ona fesoasoani lea mo fanau. 

Alapati ma Rebecca Tupuola

O tausaga o fanau o loo resitalaina i lenei polokalame o le 5 tausaga agai atu i luga o le 20 tausaga, ma o le Aso Gafua o lea ua fuafuaina e fai ai na’o meaaoga a tamaiti ma o le a iai foi faiaoga e fesoasoani ai i fanau, ae o le Aso Faraile o lea ua polokalameina e fai ai aoga siva ma le gagana Samoa. O loo taumafai foi le polokalame e unaia fanau ia fai faatasi meaaoga ma aoga siva, auā o le lu’i o loo tuuina i tamaiti e faapea e mafai ona lelei lau siva ae faaletonu lau aoga, ae o le auga o le faamoemoe o le polokalame ia galulue paleni mea uma auā se lumanai manuia o fanau.

O le afiafi o le Aso Tofi na aloaia ai loa le tatalaina o le polokame lenei a le susuga ia Albert Tupuola ma lona faletua ia Rebecca Tupuola mo fanau lalovaoa o le atunuu. O le ausiva a le Tausala o Samoa sa tatalaina faafiafiaga o le po ona sosoo lea ma le saunoaga a le susuga ia Albert Tupuola e faafeiloai le mamalu o le atunuu ma faamalamalama le uiga tonu o le faamoemoe. 

I le taimi nei ua 76 fanau o lea ua resitalaina i le polokalame o le Tatau Manaia ma o se fuainumera tele lea ua oo i ai le naunau o fanau latou te fia maua le taleni siva o loo i le susuga ia Albert ae lē gata i lea o lea ua mafai ona aoaoina faatasi le siva ma le aganuu ma le gagana Samoa. Auā e pei ona faailoa e Albert e tatau ona fai muamua aoga e iloa ai e fanau le uiga o le pese ma le uiga o le siva ina ia mafai ona malamalama tamaiti uma i vaega ia ona faigofie ai lea ona latou taofiina se aoaoga o loo aoaoina ai i latou. O le susuga ia Asiava Tuipe’a o loo mafai ona fesoasoani i le susuga ia Albert i le gagana Samoa mo lenei polokalame.

E leai se mea e mafaia pe aunoa ma le faalagolago i le Atua e aumaia le poto ma le malamalama e faatino ai mea uma, o le talitonuga lea o le susuga ia Albert Tupuola ma lona faletua ia Rebecca Tupuola, ma le laua naunautaiga e manuia fanau talavou o Samoa mo a taeao i lenei faamoemoe.