Kelston Intermediate Samoan Group sauni malaga mo Hawaii

O le aso 15 o Me ua faasauni atu ai le kulupu Samoa i Kelston Intermediate e tuua laufanua o Niu Sila ae malaga atu i Hawaii e tali le latou valaaulia i le festival ua faaigoaina o le Hawaii Kuauli Pacific & Asia Festival. 

E 31 fanau aoga mai le vasega 9 ma le 10 o loo auai, toaiva mātua ma faiaoga e toalima o loo auai uma i lenei malaga. E eseese aoga ma atunuu o loo omai ai tamaiti aoga o loo tauaveina le igoa o Samoa i totonu o lenei faalagamaea i Hawaii.

O fanau aoga mai Kelston Boys, Kelston Girls, Avondale College ma Kelston Intermediate, ae o atunuu e o mai ai, o Samoa, Tonga, Fiti, Cook Island, Maoli ma Thailand. O le eseese o atunuu ma aoga, ae ua mafai ona tutu faatasi ma galulue faatasi i lalo o le faamalu o le kulupu Samoa i Kelston Intermediate latou te tauaveina le fu’a a Samoa i le festival i Hawaii.

O le aso 17, 18 ma le 19 e faagasolo ai le faamoemoe i Hawaii lea o loo auai atu i ai le aumalaga, e uma lena ona faasolo lea o le latou polokalame i totonu o nisi o aoga i Hawaii ae lei toe taliu mai le faigamalaga. O loo tapenaina le tele o latou faafiafiaga faaSamoa, e pei o le mauluulu, sasa, faataupati ma le ailao afi. O le susuga i le faiaoga ia Iosefa Rolani Mikaele ma le susuga ia Feleni Solomona o loo tapenaina lenei faamoemoe faatasi ai ma le lagolago malosi a mātua.

Na saunoa le susuga ia Iosefa Rolani Mikaele, o le latou valaaulia na aumai i le tausaga ua mavae ia Oketopa mai le Peresetene o le HIPACC, (Hawaii Island Pacific & Asia Cultural Celebratio), ma sa faafaigofie ona talia e le latou pule aoga ma le ofisa o faiaoga le valaaulia, ae pau le vaega na fesiligia e le alii pule poo le a se vaega tāua e aoaoaina mai e fanau aoga i lenei polokalame?

Ae na faamalamalama i ai e le susuga ia Iosefa Mikaele le tāua o le festival ma le valaaulia e aoaoina ai fanau aoga i se suiga o tu ma aganuu a isi atunuu, aemaise o aoga o loo aofia ai i lenei faamoemoe. Ae le gata i lea e mafai ai foi ona iai se suiga i fanau aoga i le malaga ese atu ma Niu Sila nei, aua e iai nisi o fanau aoga ua leva ona nonofo ma ola i totonu o Niu Sila ae lei malaga ese atu lava ma Aotearoa. O le tele o malaga a le kulupu Samoa i Kelston Intermediate e malaga agai i Samoa i le tai lua tausaga ma alu le malaga e aoaoina mai fanau i tu ma le aganuu a Samoa, ae o le taimi muamua lea ua latou faatāuaina ai le avanoa ua aumai ai le valaaulia mai se Festival mai isi atunuu, ma le faamoemoe maualuga e sili atu se isi aoaoga fou e maua mai i lenei polokalame ua auai atu i ai.

O le tausaga ua mavae na amata mai ai sailiga seleni a le aumalaga faatasi ai ma mātua, e ala lea ia latou lulu, o meaai faatau, e fesoasoani lea i le totogiina o mea o lea feoai ai i Hawaii, aua o le pasese ma le mea e nonofo ai, o le vaega patino tonu lena i le tamaititi aoga ma le matua o loo malaga, o le totogi o lona pasese ma mea o loo noofo ai.

O le po o le Aso Faraile ua mavae 2 o Me na silasila ai loa mātua ma aiga i sauniuniga a fanau lea ua sauni malaga atu mo Hawaii. Ma sa faataunuuina ai foi ma le latou po siva e saili seleni ai auā se isi seleni faaopoopo i le latou faamoemoe e pei ona faasauni atu i ai. O le susuga i le faafeagaiga ia Rolani Mikaele sa tatalaina le polokalame i le sauniga lotu, ae o le susuga i le a’oa’o ia Tavai Meni sa fai ma fofoga o le po. E maeu le lima foai ma le valevale alofa o mātua ia latou fanau, ina ua tolaulauina lo latou maau i lea afiafi e silia i le $10,000.00 le seleni sa mauaina ia latou faafiafiaga ma soa taitasi a tamaiti malaga faatasi ai ma latou tusi valaaulia sa tali atu ai le mamalu o le atunuu.

O le agaga fiafia ma le loto faafetai o le susuga i le alii pule aoga ia Phil Gordon na ia faafetai ai le mamalu o mātua o uo ma ē masani sa auai atu i lea po e lagolagoina le faamoemoe o le fanau. Na ia faafetai foi i faiaoga ma mātua aemaise o fanau aoga i tapenaga matagofie mo le latou faamoemoe ua alo atu nei i ai.