O se ulugalii ua talitonu ua aafia o la aiātatau e faataga ai ona asia le la atalii o loo taofia i le potu taofia i le falepuipui i Tafaigata, ua sulufai atu i le Ofisa o Sulufaiga i Samoa e faaleo ai lo la lē fiafia tele i le teena o laua e le pulega o le falepuipui.
O le tamā ia Sooau Vaa Brown ma lona faletua na oo atu i le falepuipui ae faatonu e toe foi se’i oo atu i le aso e sosoo ai e asi lo la atalii. Peitai ina ua oo atu i le aso na faatonu ai, ae faafeiloai i se pepa o loo matamata tetele ai le tusiga o le igoa o le tamā atoa ai ma lona faaiu ua faasā ai ona toe oo atu i Tafaigata.
O le faamatalaga a Brown e faaapea, na oo ane i le falepuipui e asi lona atalii, ona ua la maua faamatalaga o loo iai ni manu’aga i lona atalii o loo taofia i le falepuipui. “O lagona faamatua ina ua maua faamatalaga o lagona mafatia ma le alofa auā o faamatalaga, e tuga manu’aga o loo aafia ai lo’u atalii.”
Peitai ua faaopoopo le mafatia o le ulugalii ina ua oo atu i le falepuipui ae fai ane le tali e faasā.
“O se tulaga lē talafeagai ua fai mai ia te au ma lo’u toalua, o le aso foi lea na fai mai matou te toe foi atu o aso faatagaina mo asiga, ae o lea ua ese ona fai mai le faatonuga, ae o lea ua ou oo mai, ae matamata tetele lo’u igoa ma lo’u faaiu e faasā ai a’u.”
Ina ua fesiligia Sooau pe na faailoa atu se mafuaaga ua faasā ai o ia ona asia lona atalii, ae na ia tali, na faailoa atu o soo se tagata lava na molia muamua pe na tuli muamua foi sona faasalaga i le falepuipui e faasā ona toe oo atu i le falepuipui tusa lava pe oo atu e asi se isi tagata o lona aiga o loo taofia i le falepuipui.
“Lona lua, e lē o mafai ona ma o e asi lo’u atalii ona o lo’u atalii o loo taofia i totonu o le pa sima.”
Fai mai Brown o mafuaaga na o loo ia iloa na mafua ai ona ua poloka o ia mai le asia o lona atalii, ae o le fesili aisea ua ala ai ona loka lona atalii ae e lē o se pagota o le la e lei faia le faamasinoga e faamaonia ai tuua’iga faasaga i lona atallii.
“O loo manino le tulafono, se’i vagana ua faamaonia ma faasala i le falepuipui ona faatoa ta’u lea o se pagota.”
Ta’ua foi e Brown ua ia fesiligia le mafuaaga ua loka ai i le pa sima lona atalii, ae o le pa sima ua na’o pagota e loka ai, e lē loka ai ni tagata o loo taofi atu e faatali le aso o le faamasinoga.
O loo tuua’ia e Brown ni faiga faasolitulafono o loo faia i totonu o le falepuipui. O ia faiga faasolitulafono ua aafia ai lona atalii.
“O le faiga la e fai e leoleo i le falepuipui, afai ae soli le tulafono e se pagota poo se tagata e taofia atu, ae toe maua atu, ona faatonu lea o isi pagota e fasi ae matamata lelei lava i ai.”
Saunoa foi Brown e lē o se faiga fou o se faiga ua masani ai ma e talitonu lona tagata e lē fetaui, o se faiga ua tatau ona taofia. “Fai mai le teine la sa tiute i luma o le pa, e na o ni maosiosia manu’a o lo’u atalii ae o le tala na aumai ia ma’ua e le vaega taofia, e “tugā manu’aga o lo’u atalii.” “Lea la ma te mananao se’i ma vaai i ai i manu’aga ia e ta’u mai ae o lea ua faasā ma’ua.”
“Ua ou mate’ia foi le latou tupua, se’i tau faapepē manu’a, ona faatoa faailoa mai lea e faataga ma’ua ona asia.”
O le atalii o Sooau Vaa Brown o se tasi o le au taofia e toafitu lea na taumafai e sosola i tua mai Tafaigata i le amataga o le vaiaso na tea nei.
