E tapunia se isi faitotoa ae matala mai le isi faitotoa ma o avanoa atulasi nei ua saunia pea e le Atua e ala i taleni ua foai aemaise le faaaogāina tatau mo le tautuaina o le atunuu, lea e pei ona tatala aloaia ai le fale ‘oti ulu faatasi ai ma laei Samoa i le pitonuu o Shirley ua faaigoaina nei o le Henry’s Cutting & Island Style.
O lenei auaunaga fou ua faatautaia lea e le alii pule o Melekiole Miki Tauiliili (Lotofaga) ma lona faletua o Fonofili (Solosolo/Papa Sataua), sa tatala aloaia i le Aso Gafua, i se sauniga lotu puupuu na taitaia lea e Pstr Alofa Noa Fonoti mai le Ekalesia Faith & Living Ministry, na auai nisi o le aufaigaluega a le Atua o Pstr Iosefa Taula (AOG) ma le susuga Tuipalusami Mafo‘e (Worship Centre) atoa ai ma le auvalaaulia ae maise uo ma aiga malaga mai Aukilani.
O le faaauauina o lenei auaunaga e le susuga Tauiliili ina ua ia manatu e faaaogā loa le taleni ua ia te ia, aemaise ai ina ua faaletonu lana galuega masani talu aafiaga o le mafui‘e i Kalaiesetete, e ui la ina afaina lana galuega sa tausi ai si ona aiga, a o lea ua toe tatala e le Atua le isi faitotoa mo se auaunaga fou.
E ui i se louloua o le tau i lea aoauli, ae na matuā sologa lelei polokalame o le aso e pei ona faatumulia ai le nofoaga autu i le pitonuu o Shirley i Kalaiesetete.
O le fetalaiga Molioo sa faafeiloaia susuga i alii faifeau ma le valaaulia i le mae‘a ai o le momoliina o laau i Fogaa, aemaise foi o se upu tomatau mo le auaunaga fou ua amatalia, auā o le Atua lava o le faamoemoega o soo se galuega ma ia o faatasi ma le loto maualalo.
Na alo atu i le taumafataga matagofie o le aoauli aemaise le koko Samoa vevela ona ua fai lava sina malulu o lea aso.
Talu ai ona o pelega lava o le auaunaga fou aemaise foi o le lagolagosua a tauaiga, sa faapea foi ona saunia e le susuga Melekiole ma Fonofili Tauiliili nai meaalofa mo le aufaigaluega, e ala i le sua faatamalii a le susuga i le failotu faapea nai meaalofa mo alii faifeau ma faletua sa auai lea sa fetalai i ai le fetalaiga Saleutogi Lemusuitau Tauamiti.
Na ta‘ua e le alii pule e faapea o le malosiaga o lenei tautua e pogai mai le Atua ma o le laua talitonuga atoatoa lea, tau ia ina ia aogā le taleni ma meaalofa a le Atua ua foai e tautua ai le mamalu o le atunuu.
Ina ua mae‘a saunoaga ma fetalaiga o le aso, ma ua faaiuina foi i le Atua o Manuia le faamoemoe, ona faaauau lea o le galuega fou ma o toeaiina matutua lava nei o Molioo ma Lemusu (EFKS Wooston) sa uluai tatalaina i le faafunaina o la lauao.
O totonu foi o lenei fale‘oti ulu ua maua ai ma laei Samoa ma soo se ituaiga teuga mo tamaitai faapea le itupa o alii, ma avatu ai ma faamanuiaga a le tatou nusipepa o le Samoa Times ina ia manuia tele le auaunaga fou ua amatalia.
