O nisi o tagata lotu e matuā mapo faifeau pe tausi faifeau foi. E tele le faaeaea i le auauna a le Atua. E lē gata i faamatalaga a o faaaloaloga i taumafa, tupe, taavale, fale ma isi tulaga faapena.
E ui o loo lagi e Samoa le aufaigaluega a le Atua o “Ao Faalupega”, ae o le fesili, o fea o iai le tuaoi o le faaeaea, o le ola lelei o le faifeau pe a faatusa i le oi ma le lē tagolima o le ekalesia?
Ae o le isi itu, o nisi o faifeau ua taunuu ai lava le muagagana a Samoa, o loo “faafaletuluia ma fale lē malu”.
O nisi o ekalesia ua faaleano ma lē amanaia tele le tautiga o le faifeau, i le mativa ma le lē tagolima e mafua ai foi ona toe alu le faifeau e faigaluega e tausi ai lona aiga. O le ā se fesoasoani i lenei tulaga? Avea ia lenei avanoa tāua e ofo alofa atu ai i le paia ma le mamalu o si o tatou atunuu. Ou sa ma faigā o se i‘a iviivia ae o se fue lavelave e leai se poto o se tasi na te autalaina. O le Upu e masani ai le gagana faafailauga a le tulatoa e faapea, “O Samoa ua uma ona tofi”.
O lea talitonuga e faavae i le malamalamaga i le aganuu, i tu ma aga, i le gagana ma lona faaaogāina, i tala o le vavau ma tala tuutuu taliga mai i tuaa ua mavae. E faapea foi pulega ma saofaiga o matai ma suafa o aiga aemaise o le vaevaeina o fanua.
E leai se vaipanoa, se vaega o le atunuu o Samoa i ona laufanua ma ona tagata, e leai ni ona tala e faatatau i ai, o alagaupu na maua ai poo muagagana foi e mafua ai. E oo foi i le taimi na taunuu atu ai i Samoa le Talalelei, e ui e fou atu i Samoa le talitonuga Kerisiano, peitai ua uma foi ona iai lona tulaga i totonu o le faaupuga lava lea, “O Samoa ua uma ona tofi”.
E iai le talitonuga o le tala lelei e lē o se mea na faaofigata i totonu o Samoa. E taunuu atu le tala lelei ua saunia e le Atua auala uma ina ia faafaigofie le taliaina e tagata. Na faaaogāina e le Atua Nafanua e muai valoia le taunuu o le tala lelei. Na faaaogāina e le Atua Malietoa e ala i le tatalaina o lona finagalo e talia le Upu a le Atua ma le tala lelei na mafua ai ona vave ona faatalaleleiina Samoa.
O le tulaga e ofo ai, ona e taunuu atu le tala lelei ua mautu tofiga ma le faavasegaina o taitai o Samoa, atoa ai ma ala o mea e masani ai afioaga ma nuu.
E lei iai se lotu poo se ekalesia i totonu o le faavasegaina lenei.
O le mamalu ma le pulega faamatai, o Tupu ma Alii tāua o Samoa na avea ma faatumutumuga o le faatulagaina o mamalu o Samoa ma lona taitaiga.
Sa leai i totonu o lea faavasegaina se avanoa mo nisi taitai fou. Peitai ina ua ofi le tala lelei sa faapea foi ona ofi atu ona taitai, lea ua tatou faaigoaina o Faifeau.
E maeu foi le tofa tatala ma le finagalo malamalama o o tatou tuaa na mafai ai ona latou ave le faaeaea i taitai faaleagaga poo susuga i faifeau.
E lē gata ina latou taliaina, ae sa faapea foi ona latou tuuina atu i ai se faaaloalo maualuga e avea ai i latou ma tumutumuga o faaaloaloga e pei ona latou tauave ai le faalupega o “Feagaiga Tau lagi” poo le “Ao o Faalupega”. O le tumutumu o faalupega.
O le a o tatou lē taumafai e talatalaina lea vaega auā ua mautinoa lava i le tu ma le aga faasamoa le mata uma o mea i le faifeau.
E mata uma mea lelei ma faaaloaloga i le faifeau i totonu o le afioaga. A oo foi ina tulai mai ni vesiga ma maseiga i le va o aiga poo matai o se alalafaga, e pei o le faifeau e sulu i ai mo se vaifofo, se taiala ma se fesoasoani.
O aso ua mavae, o le Faifeau o le tagata sili lea ona a‘oa‘oina i totonu o se afioaga. O le galuega a le faifeau sa feagai ai o le a‘oa‘oina o le Afioga a le Atua, ae sa faapea foi ona avea ma faiaoga i le gagana, o le tusitusi, numera ma isi mataupu faapena.
O le tele o o tatou mātua na gata le maualuga o lo latou ola a‘oa‘oina i le aoga a le faifeau. O nisi foi o faifeau sa latou faia foi galuega faafomai ma tuuina atu se fesoasoani muamua i tagata manunu‘a ma mamai ae lei taunuu atu se fomai.
O le faifeau e iai i le taimi e faia ai le alalafaga i se failele ma le pepe fou, o le faifeau e iai i le taimi e valaau ai le oti, o le faifeau e iai foi i taimi e faapaia ai se nofo, e tuufaatasia ai foi se ulugalii fou.
O nei galuega faatino ua avea ma ala ua maualuga ai le vaai a si o tatou atunuu i susuga i faafeagaiga ma le galuega fai.
Poo le ā lava le tele o tonu tatou te faia, ae a oo loa ina tuu mai le finagalo o le faifeau, e faapea lava ona ao uma o tatou manatu ae lolo uma taofi i le finagalo o le faafeagaiga.
E iai vaega tāua i lea tulaga e ao ona tatou manatua i taimi uma a o tatou fetausiai faaleekalesia, ma tatou tausi feagaiga ma le faifeau. Ia malamalama le ekalesia aemaise o taitai i le loto o le faifeau ma le mea ua tuuina e le Atua i lona loto mo le taitaiina o le galuega faaleagaga.
Afai e moni e afua mai mauga le manuia o le nuu, o lona uiga e tāua lo tatou malamalama i le taitaiga faaleagaga ua tuuina e le taitai mo oe.
O le a tatou talanoa i va o le Ekalesia ma le faifeau. Ona oo lea o se talanoa mai i le itu faafaifeau, atoa ai ma se vaai mai i le itu a le faifeau.
• E lē faigofie le galuega faafaifeau
Afai o oe o le tagata lotu, ia e manatua mea nei. E faigata le galuega faafaifeau. E lē faigofie. Aua ne‘i avea oe, le tagata lotu poo se tasi o taitai ma faatiga i le faifeau. Aua e te faatusatusaina o ia i isi faifeau. Ia manatua e tofu le faifeau ma lona valaauina ma lana faauuga mai le Atua (Roma 15:7).
O le faifeau e lē o se Agelu. O le faifeau o le tagata e pei o oe ma a‘u. O ona lagona foi ma manaoga e tutusa lava ma oe ma a‘u. O ona atugaluga ma ona vaivaiga e tutusa uma ma i tatou. O nisi o tagata o le tele ia o latou tala e faitio ai i le faifeau. Afai e sili atu le lelei o au tonu ma lelei ou manatu nai lo le faifeau, aisea ea ua lē avea ai la oe ma faifeau?
• O lau mafutaga ma le faifeau
O lau faifeau ma le feagaiga ua osia ma ia e tāua tele lea mo oe. E pei o se feagaiga lea e osia i le aso o le faaipoipoga, e faapena foi le tāua o le mafutaga ma lau faifeau. Ia e tausi ia te ia i taimi e lelei ai atoa foi ma taimi e lē lelei ai. Ia e tatalo mo ia ma tautala lelei mo ia i le va ma tagata. Aua le kiina o ia i lalo. Ia e faamalosi ia te ia. E te moomia se mafutaga vavalalata ma le faifeau. Soo se Samoa lava e malamalama i le pule faamatai. E faalogo foi i le finagalo o le Sa‘o poo le taitai o le aiga. O le faifeau o lou taitai faaleagaga lea. E tāua lou mafuta ma ia, faalogo i lona finagalo.
Faaauau i le vaiaso a sau
Ia faamanuia le Atua ia te oe
Lui Ponifasio
www.luiponifasio.wordpress.com
