O le vaiaso na tea atu nei sa faatasia ai tamalii o Samoa i soo se itu o le aai tele o Melepone, aua le filifilia lea o sui o le Fono Faufautua a Samoa i totonu lava o lenei vaiaai.
E legata i lea, ae sa faatalanoaina ai foi ma ni isi o mataupu taua aua lava le lumanai ma le agai i luma o le Fono, aemaise ai o le finauina o ni auala e faaono maua ai ni faamanuiaga mai le Malo, mo le manuia o tagata o si o tatou atunuu i totonu o lenei Setete o Melepone.
Sa toatele le mamalu osi o tatou atunuu sa auai, ma e maeu foi le lagolago atu o tamalii Samoa, aemaise lava foi i latou ua loa lo latou soifua tautua i le atunuu i le tele o matata e pei ona galulue ai.
O tofi o le Fono ua see mai ai le afioga Lemalu Faasavalu Satupai Tevaseu i le tofiga taitaifono, o le sui taitaifono ua pale mai ai le susuga Tumukisa Amituanai Vaeluaga.
O le failautusi o le susuga Tuna Tusi, ma le teutupe o le susuga Christine Sevita.
E tele nisi o tofiga o loo faapea ona seei ai ni isi foi o tamalii filifilia o le Fono, ae tasi lava le auga ina ia maopopo ma tasi se finagalo o Samoa, aua le finauina o vaega e maua ai faamanuiaga mo nai o tatou tagata, aemaise foi o le galulue soosoo tauau ai o le Fono e fai ma sui o Samoa i Melepone, ma le Malo Ausetalia.
