Mo le uluai taimi i Samoa ma le Pasefika ua faatuina ai se nofoaga mo fiafiaga e ala i faaluega ma masini tietie ai fanau ma mātua, na aloaia lona faapaiaina e le Afioga ia Patele Lui Sanele o le faatonu o faasalalauga ma fesootaiga a le Ekalesia Katoliko i Samoa i le Aso Toonai talu ai nei i lona nofoaga i Tafaigata.
O le Fiafia Park ua faaigoaina e le Alii Palemia o Samoa, o se pisinisi ua faatuina e le alii lauiloa ia Tupai Bruno lea na te aumaia e lē gata o Samoa ae o isi atunuu o le lalolagi sa malaga i ai faaaliga ofoofogia (circus) o loo auai i ai alo e toalima o le atunuu. O le Alii Palemia sa ia saunoa e faailoa le tāua o lenei nofoaga atoa ai ma le taulagalaga i mea lelei o Tupai auā lo tatou atunuu. O le Fiafia Park ma lona autū ia faafiafiaina ai fanau aemaise o se nofoaga e agai i ai aiga. O le ulufale e $6 mo fanau ae $12 mo tagata matutua. Ua faailoa foi o se taimi o le a fausia ai se pa (zoo) e tuuina i ai ni manu auā le agai i ai o maimoaga a le atunuu.
E lei faamautuina mai pe fia se tau aofai o lea atina’e, ae o se fiafiaga sili i le alii o Tupai Bruno ona o le fesoasoani atu a le malo i le taumafaiga o se avanoa mo lea foi atina’e auā le faafiafiaina o fanau.
