O le masina na mave nei sa faia ai le faafotu tupu o le matua ia Fuataga o le alii o Lalomanu i lona maota i Matautu’a’ai. O le autasiga o suli o le aiga, na filifilia ai Faasii Iakopo Faasii e faaee i ai le suafa Fuataga o le Tuiatua Faanofonofo poo le Tofa i le tootoo, e suli mai ia Matapogi o se tasi o suli faavae o le suafa. Sa alii taeao Lalomanu faapea aiga, ma faapaia ai e Lutau le nofo, ae sa faaee atu manuia o le Atua i le malumalu o le EFKS e le susuga i le faifeau o Etisone Gafa. Sa momoli mai le nofo e Leifi o suli o Matuuleilua faapea foi le lagolago o suli faavae ia Fonotoe Pierre e suli mai ia Saafa, Fesola’i Aleni Sofara e suli mai ia Matuuleilua o suli o Seluia mai le gafa o Aiono i Matavai Fasitoouta, aemaise ai suli o Sapoa, o suli faavae ia e fā o le aiga.
Na faailoa e Fesola’i Aleni Sofara o se tasi mai suli faavae o le suafa. “Ua loa tausaga o lea faatoa toe oo lava suli faavae i le suafa, o se tulaga na aumai mai le faaiuga a le faamasinoga o Fanua ma Suafa i le 1997.” O le nofo mulimuli nei o le suafa sa saofai mai ai lē ua faiilagi le folauga ia Fuataga Kasimani, ona tuua mai ai lea o le suafa, sa agai mai le aiga i le faamasinoga ona o le finauina lava o le nofo mai suli faavae. O le faaiuga la a le faamasinoga lea ua mafai ai ona iai le faasologa o le nofo i luga o suli faavae e iai le masina na tea nei. Sa vaaia le fiafia o tagata uma aemaise ai o tu ma aga e masani ai Samoa, e lei toe tuua se mea e tasi, e tusa ma le $100,000 na faaalu i faaaloaloga masani i la tatou aganuu, auā lafo o le itumalo faapea malo usu mai i itu e fia sa auai i le faafotu tupu o le alii o Lalomanu.
Saunoa le sui o le aiga poo le ā le faigata ma taugata i o latou manatu o le faatinoga ae lē mafai ona tavavae ese le lagona o le suli e ana ia le suafa e finau atu ona o mea faapenei ina ia maopoopo ma nofolelei aiga, ae lē gata i lea o le tautua i Afioaga ma Ekalesia e masani ai le Samoa.
