O se tasi o alii loia ua tele tausaga na tautua ai i le atunuu i le taaloga o le Lakapi le susuga ia Loau Donald Aukusitino Kerslake ua filifilia nei e avea ai ma se tasi o faamasino o le Faamasinoga Faa-Itumalo a le atunuu. I se pepa o faamatalaga e pei ona tuuina mai e le Ofisa Sili o le Matagaluega o Faamasinoga a le atunuu, o ia foi o le failautusi o le komisi o Faamasinoga a le atunuu, susuga ia Moliei Simi Vaai, na taua ai i lea pepa o faamatalaga le filifilia ai o Loau i le masina o Novema o le tausaga na tea nei ma faamaonia ai e le Kapeneta i le masina o Tesema 2019.
O le susuga ia Loau Donald Kerslake, o se alii loia ua tele tausaga o galue ai i le ofisa loia o Meredith & Kerslake Lawyers, sa avea foi o se tasi o faufautua malosi i le tele o mataupu a le faamasinoga i Samoa. O Loau na soifua mai i le aso 6 o Aokuso 1980 i totonu o Kalaiesetete Niu Sila, o se alo foi e faasino i se tasi o tamalii o le atunuu ua tele tausaga sa galue ai i le faamasinoga ma avea ai ma Peresetene o le Faamasinoga o Fanua ma Suafa, le Afioga ia Tuala Sale Tagaloa Kerslake.
O le susuga ia Loau Donald Kerslake na uluai filifilia ai mo le Manu Samoa 15 i le tausaga e 2005 lea na taalo ai mo lana taaloga muamua mo le Manu Samoa i le taaloga ma Toga na faia ai i le malae taalo faavaomalo a le atunuu i le Apia Park i le masina o Aperila o le 2005. E 9 taaloga faavaomalo na mafai ona taalo ai Kerslake mo le Manu Samoa mai le tausaga e 2005 agai i le 2007.
O le tausaga foi e 2007 na filifilia ai Kerslake e kapeteni ai i le aulakapi o le Upolu Samoa mo le taamilosaga lakapi a le Pacific Rugby Cup lea na tausinio faatasi ai Samoa, Toga ma Fiti. E lē galo i le Iuni Lakapi a le atunuu lea tausaga ina ua faatoilalo ai e le Upolu Samoa le au malosi a le Ta’uuta Reds mai Toga i totonu o le malae o Teufaiva Park i Nukualofa i Toga a’o kapeteni ai Loau Donald Aukusitino Kerslake i le Upolu Samoa. O Kerslake sa taalo ai mo lana kalapu lakapi a le afioaga o Vaiala.
O le Aso Faraile nei 10 o Ianuari ua faamoemoe e faatauto ai Kerslake i luma o le faamasinoga i Mulinuu, ua faailoa mai foi e le ofisa sili o Faamasinoga le faia ai o se sauniga lotu faapitoa i le Aso Lua o le vaiaso nei, 7 o Ianuari e tatala aloaia ai mataupu mo Faamasinoga a le atunuu i lenei tausaga 2020. O lenei sauniga lotu ua faamoemoe e taitaia e le Afioga Akiepikopo Alapati Lui Mataeliga ma saunoa ai Vui Clarence Nelson i le saunoga autu e tatala ai faamasinoga o lenei tausaga. O lo o iai foi le faamoemoe o le Matagaluega o Faamasinoga a le atunuu e fa’ataunuu ai ni semina mo faamasino uma o le faamasinoga mai le aso 8 seia oo i le aso 14 o le masina lenei o Ianuari 2020.
E iai le talitonuga o se tasi o mataupu o le a tulituli ai e le toatele i lenei tausaga, o le faaono filifilia lea o se tasi e na te tauaveina le nofoa o le Faamasino Sili ina ua mae’a ai se taimi umi o pale mai ai lē sa avea ma Faamasino Sili a le atunuu talu ai, o Patu Tiavaasu’e Falefatu Maka Sapolu.
O le taimi nei o le susuga ia Vui Clarence Nelson o loo ia tauaveina lē tumau le tofiga o le Faamasino Sili seia aloaia ai le filifiliga o se Faamasino Sili i le lumanai.
